'பிரதமராக ராகுல் பதவியேற்ற மறுநாளே ஸ்டாலின் முதலமைச்சராவார்' - ப.சிதம்பரம்

கோவை: மத்தியில் பிரதமராக ராகுல் காந்தி பதவியேற்ற மறுநாளே ஸ்டாலின் முதலமைச்சராவார் என, காங்கிரஸ் மூத்தத் தலைவர் ப.சிதம்பரம் தெரிவித்துள்ளார்.

சூலூர் சட்டப்பேரவை தொகுதி திமுக வேட்பாளர் பொங்கலூர் பழனிசாமியை ஆதரித்து, காங்கிரஸ் மூத்தத் தலைவரும், முன்னாள் மத்திய அமைச்சருமான ப.சிதம்பரம், நேற்று கருமத்தம்பட்டி பகுதியில், பரப்புரை மேற்கொண்டார்.

அப்போது பேசிய அவர், " தமிழகத்தில் அதிமுக நடத்தும் அரசு பாஜகவின் பாவைக்கூத்து. அதிமுக நடத்தும் அரசை, அரசு என சொல்லவே வெட்கமாக இருக்கிறது. மத்தியில் மாற்று ஆட்சி விரைவில் ஏற்படும். மத்தியில் பிரதமராக ராகுல் காந்தி பதவியேற்ற மறுநாளே, திமுக தலைவர் ஸ்டாலின் தமிழகத்தில் முதலமைச்சராவார்" , என தெரிவித்தார்.