மின்னணு வாக்குப்பதிவு இயந்திரங்கள் ரேண்டம் முறையில் அனுப்பிவைப்பு!

கிருஷ்ணகிரி: ஓசூர் சட்டமன்ற இடைத்தேர்தலுக்காக மின்னணு வாக்குப்பதிவு இயந்திரங்களை கிருஷ்ணகிரி மாவட்ட தேர்தல் நடத்தும் அதிகாரி டாக்டர் எஸ். பிரபாகர் ரேண்டம் முறையில் ஆய்வு செய்து அனுப்பி வைத்தார்.

மக்களவைத் தேர்தல் மற்றும் ஓசூர் சட்டமன்ற தொகுதி இடைத்தேர்தல் பணிகள் குறித்து தேர்தல் பொது பார்வையாளர் டாக்டர் ராம் ராவ் போன்ஸ்லே மற்றும் ஓசூர் சட்டமன்ற தேர்தலுக்கான பொது பார்வையாளர் கல்யாண் சந்த் லட்சுமணன் மற்றும் மாவட்ட ஆட்சித் தலைவர் டாக்டர் எஸ். பிரபாகர் ஆகியோர் முன்னிலையில் வாக்குப்பதிவு இயந்திரங்கள் கணினி முறையில் பிரிக்கப்பட்டு தொடர்புடைய வாக்குச்சாவடிகளுக்கு அனுப்பி வைக்கும் பணி இன்று நடைபெற்றது.

முன்னதாக நாடாளுமன்ற பொதுத்தேர்தல் மற்றும் ஓசூர் சட்டமன்ற தொகுதி இடைத் தேர்தலையொட்டி அனைத்து கட்சி பிரமுகர்கள் முன்னிலையில் சட்டமன்ற தொகுதியில் வாக்குச்சாவடிகளுக்கு மின்னணு வாக்குப்பதிவு இயந்திரங்கள் இரண்டாம் கட்டமாக கணினியில் ரேண்டம் முறையில் பிரிக்கப்பட்டு செயல்விளக்கம் காண்பிக்கப்பட்டது

ஊத்தங்கரை சட்டமன்ற தொகுதிக்குட்பட்ட 287 வாக்குச் சாவடிகளுக்கும் பர்கூர் சட்டமன்ற தொகுதிக்குட்பட்ட 292 வாக்குச் சாவடிகளுக்கும் கிருஷ்ணகிரி சட்டமன்ற தொகுதிக்குட்பட்ட 307 வாக்குச் சாவடிகளுக்கும் வேப்பனஹள்ளி சட்டமன்ற தொகுதிக்குட்பட்ட 301 வாக்குச் சாவடிகளுக்கும் ஓசூர் சட்டமன்ற தொகுதிக்குட்பட்ட 364 வாக்குச் சாவடிகளுக்கும் மற்றும் தளி சட்டமன்றத் தொகுதிக்குட்பட்ட 296 வாக்குச்சாவடிகள் என மொத்தம் ஆயிரத்து 850 வாக்குச்சாவடிகளுக்கு கணினி முறையில் ரேண்டம் வழியில் வாக்குப்பதிவு இயந்திரங்கள் பிரித்து அனுப்பும் பணி நடைபெற்றன.