திருமணம் வேண்டாம்... இளைஞர் தற்கொலை முயற்சி

பெற்றோர் முடிவு செய்த திருமண ஏற்பாடு பிடிக்காமல் இளைஞர் ஒருவர் தற்கொலை முயற்சியில் ஈடுபட்டார்.

சேலம்: ஆத்தூரை அடுத்த தம்மம்பட்டி பகுதியில் உள்ள காந்தி நகரைச் சேர்ந்தவர் தச்சு தொழிலாளி முருகன். இவரது மகன் விஜயராகவன் (23), தந்தையுடன் இணைந்து தொழிலில் ஈடுபட்டுவருகிறார்.

இவருக்கு திருமணம் செய்து வைக்க விரும்பிய பெற்றோர் அதற்கான ஏற்பாடுகளை செய்தனர். எனினும், தற்போது திருமணத்தில் விருப்பம் இல்லாத விஜயராகவன், திருமண ஏற்பாட்டை நிறுத்தும்படி பெற்றோரிடம் வலியுறுத்தியதாக கூறப்படுகிறது.

அதற்கு அவரது தந்தை மறுப்பு தெரிவித்ததால், நேற்று (ஜூன்.29) காலை இருவருக்கும் இடையே கடும் வாக்குவாதம் ஏற்பட்டது. இதனால் விரக்தியும், ஆத்திரமும் அடைந்த விஜயராகவன் தற்கொலைக்கு முயன்றதாக தெரிகிறது.

இதில் படுகாயம் அடைந்த அவரை மீட்ட உறவினர்கள் ஆத்தூர் அரசு மருத்துவமனைக்கு கொண்டு சென்றனர். அங்கு அவருக்கு சிகிச்சை அளிக்கப்பட்டு, அன்றே வீடு திரும்பினார்.

இதற்கிடையே, இளைஞரின் தற்கொலை முயற்சி குறித்து தம்மம்பட்டி காவல் துறையினரிடம் கேட்டபோது, ‘நீங்கள் குறிப்பிடும்படியான சம்பவம் எதுவும் நடைபெறவில்லை, காவல் நிலையத்தில் அதுபோன்ற எந்த புகாரும் பெறப்படவில்லை. விசாரணை எதுவும் நடக்கவில்லை’ என்று தெரிவித்தனர்.