தற்காலிகமாகப் பணியமர்த்தப்பட்ட 90 செவிலியர் திடீர் பணிநீக்கம்

கரோனா இரண்டாவது அலையின்போது அடுக்கம்பாறையில் உள்ள அரசு மருத்துவக் கல்லூரி மருத்துவமனையில் தற்காலிகமாகப் பணியமர்த்தப்பட்ட 90 செவிலியர் திடீரென பணிநீக்கம் செய்யப்பட்டனர்.

வேலூர்: அடுக்கம்பாறையில் உள்ள வேலூர் அரசு மருத்துவக்கல்லூரி மருத்துவமனையில் கரோனா சிகிச்சைக்காகச் சிறப்பு வார்டுகள் அமைக்கப்பட்டன. இந்நிலையில் கரோனா இரண்டாவது அலையில் அதிகமானோர் பாதிக்கப்பட்டதால் கூடுதலாகப் படுக்கைகள் ஏற்படுத்தப்பட்டன.

மேலும் வேலூர் மாவட்டத்தில் கரோனா வார்டுகளில் பணியாற்றுவதற்காகத் தற்காலிகமாக மருத்துவர்கள், செவிலியர் ஒப்பந்த அடிப்படையில் பணியமர்த்தப்பட்டனர்.

அந்தவகையில் அடுக்கம்பாறையில் உள்ள வேலூர் அரசு மருத்துவமனை மருத்துவக் கல்லூரி கரோனா வார்டில் மட்டும் கடந்த மே 13ஆம் தேதி 90 செவிலியர் தற்காலிகமாகப் பணியமர்த்தப்பட்டனர். அவர்கள் கடந்த இரண்டு மாதங்களாகப் பணியில் இருந்துள்ளனர்.

இந்நிலையில் இன்று (ஜூலை 1) திடீரென 90 பேருக்கும் வேலை இல்லை எனக் கூறி மருத்துவ நிர்வாகம் திருப்பி அனுப்பியுள்ளது. இதனால் அதிர்ச்சியடைந்த செவிலியர் 90 பேரும் வேலூர் மாவட்ட ஆட்சியரிடம் மனு அளிக்க வந்தனர்.

இன்று நான்கு அமைச்சர்கள் பங்கேற்ற ஆலோசனைக் கூட்டம் நடைபெற்றதால், இவர்கள் அலுவலகத்திற்கு உள்ளே அனுமதிக்கப்படவில்லை. பின்னர் நீண்ட நேர காத்திருப்புக்குப் பிறகு ஆட்சியர் அலுவலகத்தின் உள்ளே அனுமதிக்கப்பட்டு ஆட்சியரின் நேர்முக உதவியாளரிடம் கோரிக்கை மனுவினை அளித்தனர்.

தற்காலிகமாகப் பணியமர்த்தப்பட்ட செவிலியர் பணிநீக்கம்

இது குறித்து அவர்கள் கூறுகையில், “நாங்கள் ஏற்கனவே தனியார் மருத்துவமனைகளில் வேலை பார்த்துவந்தோம். கரோனா சிகிச்சை வார்டில் வேலை வாய்ப்புள்ளதாக அறிவிக்கப்பட்டதும் அரசு வேலை கிடைக்கும் என்ற நம்பிக்கையில் அரசு மருத்துவமனைகளில் தினம் 444 ரூபாய் ஊதியத்திற்கு தற்காலிகமாகப் பணியில் சேர்ந்தோம்.

தற்போது கரோனா வார்டுகள் காலியாகிவருவதால் வேலை இல்லை எனக் கூறி திடீரென திருப்பி அனுப்பிவிட்டனர். மேலும் இரண்டு மாதங்களாகப் பணியாற்றியதற்கு தற்போதுவரை சம்பளம் வழங்கவில்லை.

இந்த வேலையை நம்பி ஏற்கனவே நாங்கள் பார்த்துவந்த தனியார் மருத்துவமனையிலும் வேலையை இழந்துவிட்டோம். எனவே, எங்களுக்கு மீண்டும் வேலை வழங்க வேண்டும். இரண்டு மாத ஊதியத்தைத் தர நடவடிக்கை எடுக்க வேண்டும்.

மேலும் இதுவரை அரசு சார்பில் நாங்கள் தங்கியிருந்த உணவக விடுதி அறையை காலிசெய்ய சொல்கிறார்கள். எங்கு செல்வது எனத் தெரியவில்லை” எனக் கூறினர் கவலை தோய்ந்த முகத்துடன்.