திருச்சி மாவட்டம் ஸ்ரீரங்கம் வடக்கு உத்தர வீதியிலுள்ள மன்னார்குடி ஜீயர் மடத்தைச் சேர்ந்த செண்டலங்கார செண்பக மன்னார் ஜீயர் இன்று (பிப். 9) செய்தியாளர்களை சந்தித்தார். அப்போது அவர் கூறியதாவது:
பசு உள்ளிட்ட கால்நடைகளை ஒரு இடத்திலிருந்து மற்றொரு இடத்துக்கு கொண்டு செல்லும்போது உரிய விதிமுறைகளை பின்பற்ற வேண்டும் என்று உயர் நீதிமன்றத்தில் வழக்கு தொடரப்பட்டிருந்தது. இந்த வழக்கில் உயர் நீதிமன்றம் தீர்ப்பளித்துள்ளது. அதில் ஒரு இடத்திலிருந்து கால்நடைகளை மற்றொரு இடத்துக்கு கொண்டு செல்லும் போது அவற்றுக்கு வேண்டிய உணவு, தண்ணீர், கால்நடை மருத்துவரின் சான்றிதழ், கால்நடைகளுக்கு இடையே 6 அடி இடைவெளி இருக்க வேண்டும் உள்ளிட்ட பல விதிமுறைகளை பின்பற்றுமாறு தெரிவித்துள்ளது.
கால்நடைகளை துன்புறுத்தக்கூடாது. அதோடு 50 கிலோ மீட்டர் பயணம் செய்தவுடன் கால்நடைகளைக் கீழே இறக்க வேண்டும். சிறிது ஓய்வுக்குப் பின்னர் மீண்டும் கால்நடைகளை வாகனங்களில் ஏற்றிச் செல்ல வேண்டும்.
மாவட்ட ஆட்சியர், கால்நடை மருத்துவர், காவல்துறையினர், வட்டார போக்குவரத்து அலுவலர் ஆகியவர்கள் கொண்ட குழு இந்த விதிமுறைகளை அமல்படுத்தப்படுகிறதா என்பதை கண்காணிக்க வேண்டும். சட்ட விதிமுறைகளை மீறுவோர் மீது நடவடிக்கை எடுக்க வேண்டும் என்றும் உத்தரவிடப்பட்டுள்ளது.
இந்தச் சட்டத்தை அமல்படுத்துவதை கண்காணிக்க நாங்கள் குழு அமைத்து உள்ளோம். அதற்கு 'பசு பாதுகாப்பு படை' என்ற பெயரில் அமைப்பு உருவாக்கப்பட்டுள்ளது. இந்த அமைப்பைச் சேர்ந்தவர்கள் பசு மாடுகள் ஒரு இடத்திலிருந்து மற்றொரு இடத்துக்கு கொண்டு செல்வதை கண்காணிப்பாளர்கள். அப்போது சட்ட விதி மீறல்கள் இருந்தால் சம்பந்தப்பட்ட அலுவலர்களுக்கு தகவல் கொடுத்து, நடவடிக்கை எடுக்க வலியுறுத்துவார்கள்.