‘தேர்தல் வந்தால் மட்டுமே அரசியல்வாதிகளின் கண்களுக்கு மக்கள் தென்படுகிறார்கள்’

திருநெல்வேலி: தேர்தல் வந்தால் மட்டுமே மக்கள், அரசியல்வாதிகளின் கண்களுக்கு தெரிவதாக நாங்குநேரி தொகுதி மக்கள் வருத்தம் தெரிவிக்கின்றனர்.

திருநெல்வேலி மாவட்டத்தில் மொத்தம் 2 லட்சத்து 56 ஆயிரத்து 414 வாக்காளர்களைக் கொண்ட தொகுதியாக நாங்குநேரி சட்டமன்றத் தொகுதி உள்ளது. இந்நிலையில், தற்போது காலியாக உள்ள இத்தொகுதிக்கு அக்டோபர் 21ஆம் தேதி இடைத்தேர்தல் நடைபெறும் என்று தேர்தல் ஆணையம் அறிவித்துள்ளது.

இதனால் நாங்குநேரி தேர்தல் களம் தற்போது சூடுபிடித்துள்ளது. கடந்த திமுக ஆட்சி காலத்தில் சிறப்பு பொருளாதார மண்டலமாக அறிவிக்கப்பட்ட இந்த தொகுதி சுமார் 15 ஆண்டுகள் கடந்தும் திட்டமிட்டபடி தொழிற்சாலைகள் என எதுவும் அமைக்கப்படாமல் கிடப்பில் போடப்பட்டுள்ளது குறிப்பிடத்தக்கது. மேலும் போதுமான போக்குவரத்து வசதிகள், சாலை வசதிகள், குடிநீர் வசதிகளின்றி சிரமப்படுவதாகவும் அந்த தொகுதி மக்கள் தெரிவிக்கின்றனர்.

1977 முதல் கடந்த முறை நடந்து முடிந்த சட்டப்பேரவைத் தேர்தல் வரை அதிமுக 5 முறை, திமுக அதன் கூட்டணி கட்சிகள் 4 முறை வென்றுள்ளது. ஒரு முறை ஜனதா கட்சி வேட்பாளரும் வெற்றி பெற்றுள்ளார். கடந்த சட்டப்பேரவைத் தேர்தலில் அதிமுக சார்பில் வேட்பாளராக நின்ற விஜயகுமாரை விட 10.04 % வாக்குகள் அதிகம் பெற்று வசந்தகுமார் 74 ஆயிரத்து 932 வாக்குகள் பெற்று வெற்றி பெற்றார். நாங்குநேரி சட்டப்பேரவைத் தொகுதியில் எச்.வசந்தகுமார் இரண்டு முறை வெற்றி பெற்று மக்களுக்காக சொந்த செலவில் சில திட்டங்களை நிறைவேற்றியுள்ளதால் மக்கள் மத்தியில் நல்ல மதிப்பு பெற்றிருந்தார். இதையடுத்து நடந்து முடிந்த மக்களவைத் தேர்தலில் கன்னியாகுமரி தொகுதியில் போட்டியிட்டு வெற்றிபெற்றதைத் தொடர்ந்து நாங்குநேரி தொகுதி காலியாகியது.

தற்போது இந்த தொகுதிக்கான இடைத்தேர்தல் அறிவிக்கப்பட்டுள்ள நிலையில், தேர்தலில் போட்டியிடும் வேட்பாளர்களை அறிவிக்கும் முன்பே சில கட்சிகளில் கடும் போட்டியும் பேரமும் தொடங்கியது. இந்நிலையில், தேர்தல் வந்தால் மட்டுமே மக்கள் அரசியல்வாதிகளின் கண்களுக்கு தெரிவதாகவும் இடைத்தேர்தலின் வெற்றியை மட்டுமே குறிவைத்து களமிறங்கும் அரசியல் கட்சிகளால் தங்கள் தொகுதிக்கு எந்த ஒரு முன்னேற்றமும் ஏற்படப்போவதில்லை எனவும் வருத்தம் தெரிவிக்கின்றனர் நாங்குநேரி பொதுமக்கள்.

இதையும் படியுங்க: