குதிரை வண்டியில் திமுகவினர் ஊர்வலம்! - பொதுமக்கள் அவதி!

நெல்லை: பெட்ரோல் டீசல் விலை உயர்வை கண்டித்து போராட்டம் நடத்துவதற்கு சென்ற திமுகவினர் சாலையை ஆக்கிரமித்து ஊர்வலம் சென்றதால் பொதுமக்கள் கடும் அவதியடைந்தனர்.

பெட்ரோல் டீசல் விலை உயர்வை கண்டித்து திமுக சார்பில் இன்று மாநிலம் முழுவதும் கண்டன ஆர்ப்பாட்டம் நடைபெறுகிறது. அந்த வகையில் நெல்லை மாவட்டம் பாளையங்கோட்டை சித்த மருத்துவக் கல்லூரி எதிரே, திமுக சார்பில் கண்டன ஆர்ப்பாட்டத்திற்கு ஏற்பாடு செய்யப்பட்டிருந்தது.

ஆர்ப்பாட்டம் குறித்து பொதுமக்களின் கவனத்தை ஈர்க்கும் வகையில் முன்னாள் சட்டமன்ற உறுப்பினர் மாலைராஜா, நெல்லை வண்ணாரப்பேட்டையில் இருந்து ஆர்ப்பாட்டம் நடைபெறும் சித்த மருத்துவக் கல்லூரி வரை, குதிரை வண்டியில் ஊர்வலமாக சென்றார். அவருடன் திமுக நிர்வாகிகள் மற்றும் தொண்டர்களும், மோட்டார் பைக், சைக்கிள்களில் கையில் கொடிகளை ஏந்தி ஊர்வலமாக சென்றனர்.

திமுகவினர் சாலை முழுவதையும் ஆக்கிரமித்து பின்னால் வரும் வாகனங்களுக்கு வழிவிடாமல் மெதுவாக சென்றதால், வாகனங்கள் ஒன்றன்பின் ஒன்றாக அணிவகுத்து நின்றன. இதனால் வண்ணாரப்பேட்டை-பாளையங்கோட்டை சாலையில் கடும் போக்குவரத்து நெரிசல் ஏற்பட்டது. இதனால் காலையில் வேலைக்கு செல்வோர் மற்றும் பொதுமக்கள் கடும் இன்னலுக்கு ஆளாயினர்.

இதையும் படிங்க: ’வடமாநிலங்களில் செய்த சூழ்ச்சி புதுச்சேரியிலும் தொடர்கிறது’