'காங்கிரஸ் வேட்பாளர் தோற்பது உறுதி' - அமைச்சர் ஆர்.பி.உதயகுமார்!

மதுரை: நாங்குநேரியில் போட்டியிடும் காங்கிரஸ் வேட்பாளர், காஞ்சிபுரத்தில் இருந்து இறக்குமதி செய்யப்பட்டவர், நமது வேட்பாளர் உள்ளூரை சேர்ந்த சாமானியர் என அமைச்சர் ஆர் பி உதயகுமார் செய்தியாளர் சந்திப்பில் தெரிவித்தார்.

மதுரை விமான நிலையத்தில் அமைச்சர் ஆர்.பி.உதயகுமார் செய்தியாளர்களைச் சந்தித்துப் பேசினார். அப்போது, காங்கிரஸ் கட்சியினர் உள்ளூரிலேயே வேட்பாளர்கள் கிடைக்காமல், தகுதியை வைத்து வேட்பாளர்களை வரையறை செய்திருக்கிறார்கள் என்பது மக்களுக்கு நன்றாகத் தெரியும் என்றார்.

மேலும், காஞ்சிபுரத்திலிருந்து இறக்குமதி செய்யப்பட்ட வேட்பாளரின் தகுதி என்ன, அவருடைய கட்சிப் பணி என்ன, அவருக்கான மக்களின் தொடர்பு என்ன என்பது அதிமுக சொல்வதற்கு முன்பாகவே மக்களுக்குத் தெளிவாக தெரிந்திருக்கிறது என்று கூறினார்.

காங்கிரஸ் வேட்பாளர் எதன் அடிப்படையில் தேர்வு செய்யப்பட்டிருக்கிறார் என்பது மக்களுக்கு தெரிந்த காரணத்தினால் காங்கிரஸ் வேட்பாளர் தோற்பது உறுதி என்று கூறிய அமைச்சர் ஆர்.பி.உதயகுமார், அதிமுக சார்பில் போட்டியிடும் புதிய வேட்பாளர் இரட்டை இலை சின்னத்தில் மாபெரும் வெற்றி பெறுவார் என்றும் கூறினார்.

இதையும் படிங்க: இந்தியாவின் தோழமை நாடாகும் நெதர்லாந்து!