கும்பகோணத்தைச் சேர்ந்த கண்ணன் உயர் நீதிமன்ற மதுரைக் கிளையில் தாக்கல்செய்த பொதுநல மனுவில் "தஞ்சை மாவட்டம் கும்பகோணத்தில் உள்ளது மகாமகம் குளம். இது கும்பகோணத்தில் கோயில் குளமாகப் பயன்படுத்தப்படுகிறது. இது மிகவும் புனிதமானதாகவும், தமிழ்நாட்டின் மிகப்பெரிய கோயில் குளமாகவும் கருதப்படுகிறது.
மகாமகம் பெருவிழா
கும்பகோணத்தில் உள்ள மகாமகம் குளத்தில் பன்னிரெண்டு ஆண்டுகளுக்கு ஒருமுறை நடைபெறும் “மகாமகம் கும்ப மேளா” தினத்தின்போது, கிட்டத்தட்ட பத்து லட்சம் பக்தர்கள் மேற்கண்ட மகாமகம் குளத்தில் புனித நீராடுவதற்காக இங்கு கூடுவார்கள்.
இந்த ஆண்டைப் பொறுத்தவரை வரும் 26ஆம் தேதியன்று கும்பகோணத்தில் மாசி மகா பெருவிழா கொண்டாடப்படுகிறது.
கும்பகோணம் மகாமகம் திருவிழா இந்த மாசி மகம் திருவிழாவின்போது, ஏராளமான பக்தர்கள் கும்பகோணத்தில் கூடிவருவார்கள் என்று எதிர்பார்க்கப்படுகிறது. இந்த மாசி மகம் திருவிழா மிகவும் வரலாற்று விழா காரணமாக உள்ளூர் விடுமுறையை அரசு அறிவிக்க உள்ளது. பொதுமக்கள் சம்பந்தப்பட்ட பக்தர்களின் நலன், பாதுகாப்பைக் கருத்தில் கொண்டு, சட்டம் மற்றும் ஒழுங்குப் பிரச்சினையைத் தவிர்ப்பதற்காக கும்பகோணம், அதனைச் சுற்றியுள்ள டாஸ்மாக் கடைகளுக்கு விடுமுறை அளிக்க வேண்டும். மகாமகம் திருவிழா: டாஸ்மாக் கடைகளுக்கு விடுமுறை உண்டா? இது குறித்து மாவட்ட ஆட்சியரிடம் மனு அளித்தேன். இது குறித்து எந்த நடவடிக்கையும் எடுக்கப்படவில்லை, எனவே உள்ளூர் விடுமுறை அறிவிக்கும்போது கும்பகோணத்திலும் அதைச் சுற்றியுள்ள பகுதியில் உள்ள டாஸ்மாக் கடைகளுக்கும் விடுமுறை அளிக்க உத்தரவிட வேண்டும்" என மனு தாக்கல்செய்திருந்தார்.
இந்த மனு இன்று நீதிபதிகள் எம்.எம். சுந்தரேஷ், எஸ். ஆனந்தி ஆகியோர் அடங்கிய அமர்வு முன் விசாரணைக்கு வந்தது. விசாரணையின்போது மாசி மாத திருவிழாவை முன்னிட்டு உள்ளூர் விடுமுறையின்போது மதுபான கடைகளுக்கும் விடுமுறை அளிப்பது சம்பந்தமாக மாவட்ட ஆட்சியர் ஒரு வாரத்தில் முடிவெடுத்து அறிவிக்க வேண்டும் என உத்தரவிட்டு வழக்கு விசாரணையை முடித்துவைத்தனர்.
