'புறம்போக்கில் உள்ள வீடுகளை காலி செய்ய வலியுறுத்தினால் போராடுவேன்' - திருப்பூர் எம்.பி., தடாலடி !

ஈரோடு:  கீழ்பவானி வாய்க்கால் புறம்போக்கில் 78 வீடுகள் கட்டியிருப்பதாகக் கூறி வீடுகளை உடனடியாக காலிசெய்யவேண்டும் என பொதுப்பணித்துறையினர் நோட்டீஸ் அனுப்பியுள்ளனர். வீட்டை காலி செய்ய வலியுறுத்தினால் போராட்டத்தில் ஈடுபடவுள்ளதாக  திருப்பூர் நாடாளுமன்ற உறுப்பினர் சுப்புராயன் தெரிவித்துள்ளார்.

ஈரோடு மாவட்டம் கோபிச்செட்டிபாளையம் அருகே உள்ள எலத்தூர் பேரூராட்சிக்குட்பட்ட செட்டிபாளையம் கேன்குழி பகுதியில் கீழ்பவானி வாய்க்கால் புறம்போக்கில் 200க்கும் மேற்பட்ட குடும்பங்கள் வசித்துவருகின்றனர். அவர்களது வீடுகளுக்கு மின் வசதி, சாலை வசதி உள்ளிட்ட அடிப்படை வசதிகள் பெற்றுள்ளனர்.

இந்நிலையில், அங்குள்ள 78 வீடுகள் கீழ்பவானி வாய்க்கால் புறம்போக்கில் உள்ளதாகக்கூறி, அந்த வீடுகளை காலிசெய்ய வலியுறுத்தி பொதுப்பணித்துறையினர் சார்பில் வீடுகளில் நோட்டீஸ் ஒட்டிச்சென்றுள்ளனர். அதனால் ஆத்திரமடைந்த அப்பகுதி பொதுமக்கள் பல ஆண்டுகளாக தாங்கள் இங்கு வீடுகள் கட்டி வசித்து வருவதாகவும், தற்போது கீழ்பவானி வாய்க்கால் பகுதியை ஆக்கிரமித்து கட்டப்பட்டதாகக் கூறப்படும் இடம் வாய்க்காலுக்கு பாதிப்பில்லாமல் உள்ளது.

இங்கு கட்டப்பட்டுள்ள வீடுகள் வாய்க்காலை விட்டு 100 அடிக்கும் மேல் உள்ளது. அதனால் இவ்விடத்தில் குடியிருப்பவர்களுக்கு வீட்டு மனைப்பட்டா வழங்கவேண்டும் என வருவாய்த்துறைக்கும், பொதுப்பணித்துறைக்கும் பொதுமக்கள் மனு அளித்துள்ளனர். அதன் அடிப்படையில், திருப்பூர் நாடாளுமன்ற உறுப்பினர் சுப்புராயன் இப்பகுதியை நேரில் பார்வையிட்டார்.

பின்னர் வீடுகள் குறித்து திருப்பூர் நாடாளுமன்ற உறுப்பினர் சுப்புராயன் கூறுகையில்,’வீடுகள் உள்ள இடத்திற்கும், வாய்க்கால் உள்ள இடத்திற்கும் இடைபட்ட தொலைவுகளை கணக்கிட்டு பார்த்ததில், இவ்விடத்தை இப்பகுதி பொதுமக்களுக்கு வழங்குவதில் அரசுக்கு எந்தத் தடையும் இல்லை என்றும் எதற்காக வீடுகளை காலி செய்யச்சொல்லி பொதுப்பணித்துறை நோட்டீஸ் அனுப்பியுள்ளனர் எனத்தெரிய வில்லை. இது போன்ற செயல்கள் அரசு பொதுமக்கள் மீது விரோதப்போக்கை காட்டுவதாக உள்ளது’ என தெரிவித்தார்.

அதனைத் தொடர்ந்து, இப்பகுதி பொதுமக்களை காலி செய்யச் சொல்லி பொதுப்பணித்துறையினர் வற்புறுத்தினால், அதே இடத்தில் தரையில் படுத்து போராட்டத்தில் ஈடுபடப்போவதாக சுப்புராயன் தெரிவித்துள்ளார்.

இதையும் படிங்க: பெரம்பலூரில் கல்லூரிப் பேருந்து மோதிய விபத்து; உயிருக்குப் போராடும் மாணவி!