'தற்போது சட்டப்பேரவைத் தேர்தல் வந்தால் அதிமுகதான் வெல்லும்!'

தற்போது சட்டப்பேரவைத் தேர்தல் வந்தால் அதிமுகதான் வெற்றிபெறும் என முன்னாள் அமைச்சர் எஸ்.பி. வேலுமணி கூறியுள்ளார்.

தமிழ்நாடு உள்ளாட்சித் தேர்தலை முன்னிட்டு கோவையில் அதிமுக வேட்பாளர்களை ஆதரித்து எஸ்.பி. வேலுமணி பரப்புரை மேற்கொண்டுவருகிறார். இன்று (பிப்ரவரி 11) கோவை மாநகராட்சி கவுண்டம்பாளையம், துடியலூர் பகுதியில் அதிமுக வேட்பாளர்களை ஆதரித்து பரப்புரை மேற்கொண்டார்.

பரப்புரையின்போது மக்களிடம் பேசிய அவர், அதிமுக ஆட்சியில் கவுண்டம்பாளையம் துடியலூர் பகுதியில் செய்து மேம்பாலத் திட்டம், குடிநீர்த் திட்டம் உள்ளிட்ட பல்வேறு திட்டங்களைக் கூறி வாக்குச் சேகரித்தார்.

மேலும், "தற்பொழுது உள்ள திமுக ஆட்சியில் நிறைவேற்றப்படும் திட்டங்கள் அதிமுக ஆட்சியில் கொண்டுவரப்பட்டவை. திமுக வாக்குறுதிகளில் எதுவும் நிறைவேற்றவில்லை. நீட் தேர்வு ரத்துசெய்யப்படும் என ஸ்டாலின் அளித்த வாக்குறுதியை நம்பி மாணவ மாணவிகள் உயிரிழந்ததுள்ளனர்.

பொங்கல் பரிசுத் தொகுப்பில் அதிமுக ஆட்சியில் 2000 ரூபாய் தரப்பட்டது, திமுக ஆட்சியில் 100 ரூபாய்கூட தரவில்லை. தற்பொழுது சட்டப்பேரவைத் தேர்தல் வந்தால் திமுக தோல்வி அடைந்து அதிமுக வெற்றி அடையும்.

வருகின்ற நகர்ப்புற உள்ளாட்சித் தேர்தலில் அதிமுக கட்சி வேட்பாளர்களுக்கு இரட்டை இலைச் சின்னத்தில் வாக்களித்து வேட்பாளர்களை வெற்றிபெறச் செய்ய வேண்டும்" எனக் கூறினார்.

இதையும் படிங்க:நீட் விலக்கு ஏற்படும் வரையில் சட்டப்போராட்டம் தொடரும் - கடலூரில் உதயநிதி ஸ்டாலின் பரப்புரை