கோவையில் இரு வேறு இடங்களில் ரூ. 24 லட்சம் கொள்ளை

கோவையில், முழு ஊரடங்கை பயன்படுத்தி ஒரே நாளில் இரு வெவ்வேறு இடங்களில் 24 லட்சம் ரூபாய் பணம் கொள்ளையடிக்கப்பட்டிருப்பது அதிர்ச்சியை ஏற்படுத்தியுள்ளது.

கோவை மருதமலை சாலை வேளாண் கல்லூரி அருகே இரண்டு அரசு மதுபான கடைகள் செயல்பட்டு வருகிறது. கரோனோ தொற்று பரவலைத் தடுக்கும் நோக்கில் தமிழ்நாடு அரசு ஞாயிற்றுக்கிழமைகளில் முழு ஊரடங்கை அமல்படுத்தியுள்ள நிலையில், வேளாண் பல்கலைக்கழகம் அருகேயுள்ள மதுபானக் கடையின் பூட்டை உடைத்து 10 லட்ச ரூபாய் பணம், 72 ஆயிரம் ரூபாய் மதிப்புள்ள மது பானங்களை திருடர்கள் கொள்ளையடித்துச் சென்றுள்ளனர்.

திருட்டு

இந்தக் கடையின் மேற்பார்வையாளர் வேலுச்சாமி சனிக்கிழமை (ஏப். 24) மது விற்பனை செய்த பணத்தை டாஸ்மாக் நிர்வாகம் பெற வராததால், அதனை கல்லாபெட்டியில் வைத்து பூட்டிவிட்டுச் சென்றுள்ளார். நேற்று (ஏப். 25) முழு ஊரடங்கு காரணமாக மக்கள் நடமாட்டம் இல்லாத சூழலில், மதுபானக் கடையின் பூட்டை உடைத்து மர்ம நபர்கள் பணத்தை திருடிச் சென்றுள்ளனர்.

மதுபானக் கடையில் சிசிடிவி வசதி இல்லாத காரணத்தாலும், மேம்படுத்தபட்ட கல்லா பெட்டிகள் இல்லாததாலும் எளிதில் பணத்தை திருடிச் சென்றுள்ளனர்.

மதுபானக்கடையில் கொள்ளை

இது குறித்து மேலாளர் வேலுச்சாமி அளித்த புகாரின்பேரில், சம்பவ இடத்திற்கு சென்ற ஆர்.எஸ் புரம் காவல் துறையினர் விசாரணை மேற்கொண்டு வருகின்றனர். இதே போன்று நேற்று (ஏப். 25) ஹோப் காலேஜ் பகுதியிலஉள்ள ரிலையன்ஸ் மார்ட் நிறுவனத்தின் பூட்டை உடைத்து, 14 லட்சம் ரூபாய் பணம் கொள்ளையடிக்கப்பட்டுள்ளது.

கோவை காவல் துறையினர்

சிசிடிவி கண்காணிப்பு கேமரா

இதுகுறித்து அந்நிறுவனத்தின் மேலாளர் கொடுத்த புகாரின்பேரில் சிங்காநல்லூர் காவல் துறையினர் விசாரணை மேற்கொண்டனர்.

மேலும், அங்கு பதிவாகியிருந்த சிசிடிவி கண்காணிப்பு கேமரா காட்சிப் பதிவுகளைக்கொண்டு கொள்ளையர்களை அடையாளம் காணும் பணியில் ஈடுபட்டுள்ளனர். முழு ஊரடங்கை பயன்படுத்தி ஒரே நாளில் இரண்டு இடங்களில் 24 லட்சம் ரூபாய் பணம் கொள்ளையடிக்கப்பட்டிருப்பது அதிர்ச்சியை ஏற்படுத்தியுள்ளது.