விநாயகர் சதுர்த்தி ஊர்வலம் - வாகன ஓட்டிகளுக்கு அறிவுரை

விநாயகர் சிலையைக் கரைக்க நாளை ஊர்வலமாக செல்வதால் போக்குவரத்து நெரிசல் ஏற்பட வாய்ப்புள்ளதால், வாகன ஓட்டிகள் மாற்றுப்பாதையைப் பயன்படுத்த சென்னை போக்குவரத்து காவல்துறை சார்பில் வேண்டுகோள் விடுத்துள்ளது.

சென்னை:விநாயகர் சதுர்த்தி ஊர்வலத்தை முன்னிட்டு காவல் துறை சார்பில் கட்டுப்பாடுகள் விதிக்கப்பட்டுள்ளன. இதுகுறித்து சென்னை, தாம்பரம், ஆவடி காவல் ஆணையரகம்,

”விநாயகர் சதுர்த்தியின்போது வைக்கப்பட்ட 2,554 சிலைகள் நாளை ஊர்வலமாகச்சென்று கடற்கரைகளில் கரைக்கப்பட உள்ளது. குறிப்பாக காசிமேடு, நீலாங்கரை, திருவொற்றியூர், பட்டினப்பாக்கம் ஆகிய நான்கு கடற்கரைகளில் சிலைகளை கரைக்க காவல் துறை அனுமதி வழங்கி உள்ளது.

சிலைகளைக் கரைக்க ஊர்வலமாக செல்லும்போது மதவாத வெறுப்புணர்ச்சியைத் தூண்டும் வகையிலோ, பிற மதத்தினர் உணர்வுகளைப் புண்படுத்தும் வகையிலோ முழக்கமிடக்கூடாது என காவல் துறை பல கட்டுப்பாடுகளை விதித்துள்ளது. மேலும் விநாயகர் சிலைகள் கரைக்கப்படும் இடங்கள், ஊர்வலப்பாதைகள் மற்றும் நிறுவப்பட்ட இடங்களில் பட்டாசுகள் வெடிக்கத் தடை விதித்துள்ளது.

காவல் துறை அனுமதி வழங்கிய நாட்கள் மற்றும் அனுமதிக்கப்பட்ட பாதைகளில் மட்டுமே விநாயகர் சிலைகளைக் கொண்டு சென்று அமைதியான முறையில் கரைக்க வேண்டும். சென்னை பெரு நகரில் நிறுவப்பட்டுள்ள சிலைகளை அனுமதிக்கப்பட்டுள்ள 4 கடற்கரைகளில் சிலைகளைக்கரைக்க 17 வழித்தடங்கள் அமைக்கப்பட்டு, சிறப்பு ஏற்பாடுகள் செய்யப்பட்டுள்ளன.

நாளை சிலைகளைக் கரைக்க ஊர்வலமாக வாகனங்களில் எடுத்துச்செல்வதால் முக்கிய சாலைகளில் கடும் போக்குவரத்து நெரிசல் ஏற்பட வாய்ப்புள்ளதால், வாகன ஓட்டிகள் மாற்று பாதையைப் பயன்படுத்துமாறு சென்னை போக்குவரத்து காவல் துறை அறிவுறுத்தி உள்ளது.

குறிப்பாக மதியம் 12 மணி முதல் இரவு 8 மணி வரை முக்கிய சாலைகளான சென்னை பெருநகரில் ஈவிஆர் சாலை, ஹாரிங்டன் சாலை, 100 அடி சாலை, ஆற்காடு சாலை, கோடம்பாக்கம் ரோடு, வள்ளுவர் கோட்டம் நெடுஞ்சாலை, நுங்கம்பாக்கம் ரோடு, நெல்சன் மாணிக்கம் சாலை, அண்ணா ரோட்டரி, கதிட்ரல் ரோடு, ஆர்.கே.சாலை, காமராஜர் சாலை, சாந்தோம் ஹைரோடு.

டி.ஜி.எஸ்.தினகரன் சாலை, எண்ணூர் எக்ஸ்பிரஸ் ரோடு, திருவொற்றியூர் ரோடு, எம்.எஸ் கோயில் ரோடு, தண்டையார்பேட்டை நெடுஞ்சாலை, எருக்கஞ்சேரி நெடுஞ்சாலை, பேசின் பாலம், வால்டாக்ஸ் ரோடு, பழைய ஜெயில் ரோடு, ராஜாஜி சாலை, முத்துசாமி பாலம், கொடி மரச்சாலை, காமராஜர் சாலை, வேளச்சேரி விஜயநகரம் சந்திப்பு,

ECR, OMR, LB ரோடு, தரமணி ரோடு, அண்ணாசாலை பட் ரோடு, சர்தார் வல்லபாய் படேல் ரோடு மற்றும் சில சாலைகளில் போக்குவரத்து நெரிசல் ஏற்படும் எனத் தெரிவிக்கப்படுகிறது. ஆகவே, பொதுமக்கள் மற்றும் வாகன ஓட்டிகள் சாலைகளுக்கேற்ப தங்களது பயணத்தை அமைத்துக்கொள்ளுமாறு கேட்டுக்கொள்ளப்படுகின்றனர்.

அதுமட்டுமின்றி வாலாஜா சாலை, பாரதி சாலை, பெசன்ட் சாலை, டாக்டர்.ராதாகிருஷ்ணன் சாலை, கச்சேரி சாலை, தெற்கு கெளால் பேங்க் சாலை, வழியாக வரும் வாகனங்கள் காமராஜர் சாலை, சாந்தோம் நெடுஞ்சாலை நோக்கி செல்லாமல் மாற்றுப்பாதையில் செல்லலாம்.

அடையாரிலிருந்து பாரிமுனை செல்லும் வாகன ஓட்டிகள், ராமகிருஷ்ணா மட் ரோடு வழியாக மந்தைவெளி, லஸ் கார்னர் இராயப்பேட்டை நெடுஞ்சாலை ராயப்பேட்டை மணிக்கூண்டு, ஒய்ட்ஸ்ரோடு, ஸ்மித்ரோடு அண்ணாசாலை வழியாக பாரிமுனை சென்றடையலாம். தாம்பரம் காவல் ஆணையரகத்திற்குட்ட பகுதிகளில் உள்ள சிலைகள் வேளச்சேரி விஜய நகரம் சந்திப்பு வழியாக நீலாங்கரை கடற்கரையில் கரைக்கலாம்.

சிலைகளைக் கரைக்க ஊர்வலமாக செல்லும்போது எந்தவித அசம்பாவிதங்களும் நடைபெறாமல் இருக்க சென்னை, தாம்பரம், ஆவடி காவல்துறைக்குட்பட்ட இடங்களில் 24,450 காவல் துறையினர் பாதுகாப்புப் பணியில் ஈடுபட உள்ளனர்.

சிலைகள் கரைக்கும் இடங்களில் கட்டுப்பாட்டு அறைகள் மற்றும் உதவி மையங்கள் வைக்கப்பட்டும், கோபுரங்கள் அமைக்கப்பட்டு பைனாகுலர் மற்றும் ட்ரோன் மூலமாக காவல் துறையினர் தீவிர கண்காணிப்பில் ஈடுபட உள்ளனர்.

ஒரு இணை ஆணையர், 3 துணை ஆணையர் தலைமையில் பட்டினப்பாக்கம் சிலை கரைக்கும் இடங்களில் மட்டும் 500க்கும் மேற்பட்ட காவல்துறையினர் பாதுகாப்புப்பணியில் ஈடுபடுத்தப்பட உள்ளனர்.

விநாயகர் சிலைகள் கொண்டு செல்லும்போதும், கரைக்கும்போதும் காவல்துறை கட்டுப்பாடுகளை மீறுவோர் மீதும், பொது அமைதிக்கு குந்தகம் விளைவிக்கும் நபர்கள் மீது கடுமையாக நடவடிக்கை எடுக்கப்படும்”, எனத் தெரிவித்துள்ளது.

இதையும் படிங்க:ஒரு ஆண்டில் 355 நாட்கள் காவல் நிலையத்திலும் 10 நாட்கள் கோயிலிலும் வைக்கப்படும் விநோத விநாயகர்