தமிழ்நாட்டின் வன்கொடுமை தடுப்புச் சட்ட ஆலோசனைக்கான 2ஆவது மாநில கூட்டம்!

வன்கொடுமைத் தடுப்புச் சட்டம் குறித்த மாநில அளவில் 12 ஆம் தேதி 2ஆவது கூட்டம் வரும் 12 ஆம் தேதி நடைபெறும் என அரசு அறிவிக்கப்பட்டுள்ளது.

சென்னை: ஆதிதிராவிடர் மற்றும் பழங்குடியினருக்கான வன்கொடுமைத் தடுப்புக் குறித்து மாநில அளவிலான 2 வது கூட்டம் வரும் 12 ந் தேதி நடைபெறும் என அரசு அறிவித்துள்ளது. ஆதிதிராவிடர் மற்றும் பழங்குடியினர் நலத்துறை வெளியிட்டுள்ள தகவலில், "ஆதிதிராவிடர் மற்றும் பழங்குடியினர் (வன்கொடுமைத் தடுப்பு) சட்டம் 1989, ஆதிதிராவிடர் மற்றும் பழங்குடியினர் (வன்கொடுமைத் தடுப்பு) விதிகள் 1995 மற்றும் திருத்த விதிகள் 2016, விதி 16 மற்றும் திருத்த விதிகள் 2018-இன்படி, முதலமைச்சரை தலைவராக கொண்டு இயங்கும் துறை மூலம் இந்த கூட்டம் நடைபெறுகிறது.

இதனடிப்படையில் முதலமைச்சர் தலைமையில் நிதித்துறை அமைச்சர், ஆதிதிராவிடர் நலத்துறை அமைச்சர், தொழிலாளர் நலன்-திறன் மேம்பாட்டுத் துறை அமைச்சர் மற்றும் சுற்றுலாத்துறை அமைச்சர் ஆகியோருடன் மாநில அளவிலான விழிப்புணர்வு மற்றும் கண்காணிப்புக் குழுவில் உறுப்பினர்களாக நியமனம் செய்யப்பட்டுள்ள மாநிலங்களவை, மக்களவை மற்றும் சட்டமன்ற உறுப்பினர்களுடன் 19.8.2021 அன்று முதல் கூட்டம் நடைபெற்றது.

அதனைத் தொடர்ந்து அதன் அடுத்த கூட்டம் ஏப்ரல் 12ஆம் தேதி மாலை 6.30 மணியளவில் சென்னை தலைமைச் செயலகம், நாமக்கல் கவிஞர் மாளிகையில் உள்ள 10ஆவது தளத்தில் உள்ளக் கூட்ட அரங்கில் நடைபெற உள்ளது.

வன்கொடுமைக்கு ஆளானவர்களுக்கு அளிக்கப்பட்ட தீருதவி( பாதிப்பிற்கு ஏற்ப வழங்கப்படும் உதவித்தொகை), மறுவாழ்வு மற்றும் அவை பற்றிய விவரங்கள், இந்தச் சட்டத்தின்கீழ் வழக்குகள் தொடுத்தல், சட்டத்தைச் செயற்படுத்தும் பல்வேறு அலுவலர்களின், அமைப்புகளின் பங்கு, பணி ஆகியவைகளும் அளிக்கப்படும்.

மேலும் மாநில அரசால் பெறப்படும் பல்வேறு அறிக்கைகள் மற்றும் ஆதிதிராவிடர் மற்றும் பழங்குடியினர் (வன்கொடுமைத் தடுப்பு) திருத்தச் சட்டம் 2015-இல் அத்தியாயம் IV-A–இல் உள்ளப் பிரிவுக் கூறு 15A(11)–இன்படி வன்கொடுமையால் பாதிக்கப்பட்டவர்களின் உரிமைகள் ஆகியவை குறித்து இந்த கண்காணிப்புக் குழு கூட்டத்தில் ஆய்வு செய்யப்படவுள்ளது என அதில் கூறப்பட்டுள்ளது.

இதையும் படிங்க:கல்லூரி தேர்வுக் கட்டண உயர்வை திமுக திரும்பப் பெற வேண்டும் - ஓபிஎஸ்