அலுவலர்களை மட்டும் கொண்ட குழுவிற்கு பெயர் நிபுணர்கள் குழுவா?

சென்னை: பள்ளிக்கல்வித்துறை சார்பில் அமைக்கப்பட்டுள்ள நிபுணர் குழுவில் சிறந்த கல்வியாளர்களை சேர்க்க வேண்டுமென முதலமைச்சருக்கு தமிழ்நாடு அறிவியல் இயக்கம் கடிதம் எழுதியுள்ளது.

தமிழ்நாட்டில் கரோனா தொற்றின் தாக்கத்தை அடுத்து கல்வியாண்டு முடியும் முன்பாகவே பள்ளிகள் அனைத்தும் மூடப்பட்டன. இறுதித் தேர்வு நடத்தப்படாமலேயே 1 முதல் 9 ஆம் வகுப்பு வரையிலான மாணவர்கள் அனைவரும் தேர்ச்சி பெற்றதாக அறிவிக்கப்பட்டது. இதனையடுத்து, தமிழ்நாடு அரசு சார்பில், கரோனாவால் பள்ளிக்கல்வியில் ஏற்பட்டுள்ள பாதிப்புகள் குறித்து ஆய்வு செய்ய நிபுணர் குழு அமைக்கப்பட்டுள்ளது.

அரசு அமைத்துள்ள இக்குழுவில் கல்வியாளர்களையும் இணைக்க வேண்டும் என தமிழ்நாடு அறிவியல் இயக்கம் முதலமைச்சருக்கு கோரிக்கை விடுத்துள்ளது. இது தொடர்பாக அவ்வியக்கத்தின் பொதுச்செயலாளர் சுப்ரமணி, தமிழ்நாடு முதலமைச்சருக்கு எழுதியுள்ள கடிதத்தில், “அரசு அமைத்திருக்கும் நிபுணர் குழுவைக் கண்டு தமிழ்நாடு அறிவியல் இயக்கம் அதிர்ச்சி அடைகிறது. பள்ளிக்கல்வித்துறையின் அலுவலர்கள் கொண்ட குழுவை நிபுணர்கள் குழு என்று எப்படி ஏற்றுக் கொள்வது?

ஏற்கனவே, பாடத்திட்டம் தயாரிக்க ஓர் உயர்மட்டக் குழுவை தமிழ்நாடு அரசு உருவாக்கியது. பேராசிரியர் அனந்த கிருஷ்ணன் தலைமையில் பல கல்வியாளர்கள் அக்குழுவில் இடம் பெற்றிருந்தனர். அதுபோல நாடறிந்த கல்வியாளர்களைக் கொண்டு, நிபுணர்கள் குழுவை அமைக்க வேண்டும். முற்றிலும் பள்ளிக்கல்வித்துறை அலுவலர்களைக் கொண்டு ஒரு குழுவை உருவாக்கி விட்டு, இது நிபுணர்கள் குழு எனில் அது ஏற்கத்தக்கது அல்ல.

எனவே, தமிழ்நாடு அளவில் நன்கு அறியப்பட்ட சிறந்த கல்வியாளர்கள், மாணவர்கள், ஆசிரியர்கள் சங்க பொறுப்பாளர்கள் உள்ளிட்டோரை இணைத்து, குழுவை விரிவாக்கம் செய்து, அவர்களின் ஆலோசனைகளையும், அறிக்கைகளையும் பெற்று, அதனடிப்படையில் திட்டமிட்டு செயலாற்ற வேண்டும்” எனக் கூறியுள்ளார்.

இதையும் படிங்க: அரசாணையை அடுத்து ஊழியர்கள் பணிக்கு வர பள்ளிக்கல்வித்துறை உத்தரவு!