தமிழ்நாடு ஆளுநர் வரும் 7ஆம் தேதி டெல்லி பயணம் - ஆளுநரின் திடீர் டெல்லி விஜயத்துக்கான காரணங்கள் என்ன தெரியுமா?

தமிழ்நாடு ஆளுநர் ஆர்.என்.ரவி நீட் விலக்கு மசோதாவை அரசுக்கு திருப்பி அனுப்பிய நிலையில், வருகின்ற 7ஆம் தேதி டெல்லிக்குப் பயணம் மேற்கொள்ளயிருக்கிறார்.

சென்னை: எம்பிபிஎஸ், பிடிஎஸ் போன்ற இளநிலை மருத்துவப் படிப்புகளுக்கு நடத்தப்படும் நீட் நுழைவுத் தேர்விலிருந்து தமிழ்நாட்டிற்கு விலக்கு அளிக்க வலியுறுத்தி சட்டப்பேரவையில் மசோதா ஒருமனதாக நிறைவேற்றப்பட்டு ஆளுநரின் ஒப்புதலுக்கு அனுப்பி வைக்கப்பட்டு இருந்தது.

இந்த நிலையில் தமிழ்நாடு அரசின் நீட் விலக்கு மசோதா கிராமப்புற மற்றும் ஏழை மாணவர்களின் நலன்களுக்கு எதிராக இருப்பதாக, ஆளுநர் ஆர்.என். ரவி குறிப்பிட்டு, நீட் விலக்கு மசோதாவை சட்டப்பேரவை சபாநாயகருக்கு திருப்பி அனுப்பி இருந்தார்.

ஆளுநரை திரும்பப்பெற எழுந்த கோரிக்கை

இந்த விவகாரம் அரசியல் வட்டாரத்தில் பெரும் பரபரப்பை ஏற்படுத்தியுள்ளது. இதற்கு தமிழ்நாடு அரசு மற்றும் பல்வேறு அரசியல் கட்சிகள் கடும் கண்டனம் தெரிவித்து உடனடியாக ஆளுநரை ஒன்றிய அரசு திரும்பப்பெற வேண்டுமென கேட்டுக்கொண்டனர்.

இந்த நிலையில் தமிழ்நாடு ஆளுநர் ஆர்.என்.ரவி திடீரென வரும் 7ஆம் தேதி டெல்லி பயணம் மேற்கொள்கிறார். அங்கு குடியரசுத் தலைவர், பிரதமர், உள்துறை அமைச்சர் உள்ளிட்டோரை சந்திக்க உள்ளதாகத் தகவல்கள் வெளியாகியுள்ளன.

மேலும் தமிழ்நாட்டில் சட்டம் ஒழுங்கு பிரச்னைகள், அரியலூர் மாணவி தற்கொலை விவகாரம் குறித்து ஆலோசனை மேற்கொள்ள உள்ளதாகவும் கூறப்படுகிறது.

இதையடுத்து ஆளுநர் ஆர்.என். ரவி வரும் 9ஆம் தேதி மீண்டும் சென்னை திரும்புகிறார். நீட் விலக்கு மசோதாவை தமிழ்நாடு அரசுக்கு திருப்பி அனுப்பிய நிலையில், ஆளுநர் டெல்லி பயணம் மேற்கொள்கிறார்.

இதையும் படிங்க:கச்சத்தீவு திருவிழாவில் தமிழர்களை அனுமதிக்க முதலமைச்சர் வலியுறுத்தல்