எழும்பூர், சென்ட்ரல் ரயில் நிலையங்களில் இருந்து பொங்கல் சிறப்பு ரயில்கள் - தெற்கு ரயில்வே அறிவிப்பு!

பொங்கல் பண்டிகையை முன்னிட்டு, எழும்பூரிலிருந்து நாகர்கோவிலுக்கும், சென்ட்ரலில் இருந்து கோவைக்கும் சிறப்பு முன்பதிவு அதிவிரைவு வண்டிகள் இயக்கப்பட உள்ளதாக தெற்கு ரயில்வே அறிவித்துள்ளது.

சென்னை: பொங்கல் பண்டிகையை முன்னிட்டு, எழும்பூரிலிருந்தும், சென்ட்ரலிலிருந்தும் இரண்டு அதிவிரைவு முன்பதிவு வண்டிகள் இயக்கப்பட உள்ளதாக தெற்கு ரயில்வே அறிவித்துள்ளது. இதுகுறித்து தெற்கு ரயில்வே வெளியிட்டுள்ள செய்திக்குறிப்பில், பொங்கல் பண்டிகையை முன்னிட்டு முழுவதும் முன்பதிவுக்கு மட்டுமேயான பண்டிகை கால சிறப்பு ரயில்கள் இயக்க ரயிவே வாரியம் ஒப்புதல் அளித்துள்ளது.

இதன்படி, சென்னை எழும்பூரில் இருந்து நாகர்கோவிலுக்கு வரும் 12, 13 ஆம் தேதிகளில் சிறப்பு கட்டண, பண்டிகை கால சிறப்பு ரயில்கள் இயக்கப்பட உள்ளன. அதிவிரைவு வண்டியான இந்த சிறப்பு ரயில் சென்னை எழும்பூரிலிருந்து, இரவு 10 மணிக்கு புறப்பட்டு, மறுநாள் முற்பகல், 11.10 மணிக்கு நாகர்கோவில் சென்று சேரும்.

அதே போல் மறுமார்க்கமாக, 16, 17 ஆகிய தேதிகளில் நாகர்கோவில் சந்திப்பிலிருந்து, பிற்பகல் 2.45 மணிக்கு புறப்பட்டு, அடுத்த நாள் அதிகாலை 3.40 மணிக்கு எழும்பூரை வந்தடையும்.

அதே போல, டாக்டர் எம்ஜிஆர் சென்னை சென்ட்ரல் ரயில் நிலையத்திலிருந்து, ஜன., 13 ஆம் தேதி கோவைக்கு சிறப்பு கட்டண, பண்டிகை கால சிறப்பு முன்பதிவு ரயில் இயக்கப்பட உள்ளது. இந்த ரயில் சென்ட்ரல் ரயில் நிலையத்திலிருந்து வியாழக்கிழமை இரவு11.30 மணிக்கு கிளம்பி, மறுநாள் காலை 8 மணிக்கு கோவையை சென்றடையும்.

மறுமார்க்கமாக 17 ஆம் தேதி ஞாயிற்றுக்கிழமை கோவையிலிருந்து இரவு 8 மணிக்கு கிளம்பி, மறுநாள் அதிகாலை 4.30 மணிக்கு எம்ஜிஆர் சென்ட்ரல் ரயில் நிலையத்திற்கு வந்து சேரும்

இந்த சிறப்பு கட்டண பண்டிகை கால சிறப்பு வண்டிகளுக்கான முன்பதிவு, இன்று காலை 8 மணிக்கு தொடங்குகிறது எனத் தெரிவிக்கப்பட்டுள்ளது.