இளம்பெண்களை பாலியல் துன்புறுத்தல் செய்த வழக்கு சிபிசிஐடிக்கு மாற்றம்

கோவை: பொள்ளாச்சியில் பெண்களை பாலியல் துன்புறுத்தல் செய்தது தொடர்பான வழக்கு சிபிசிஐடிக்கு மாற்றப்பட்டுள்ளது.

கோவை மாவட்டம் பொள்ளாச்சியி ஒரு கும்பல் இளம்பெண்னை பாலியல் துன்புறுத்தல் செய்து அதனை படமெடுத்து வீடியோவாக வெளியிட்டது அதிர்ச்சியை ஏற்படுத்தியது. இதுபோல் 100-க்கும் மேற்பட்ட இளம்பெண்கள் பாதிக்கப்பட்டிருக்கிறார்கள் என்று வெளியான தகவல்கள் தமிழக மக்களை உலுக்கி எடுத்திருக்கிறது.

இந்த விவகாரத்தில் சபரிராஜன் (25), திருநாவுக்கரசு (25), சதீஷ் (28), வசந்தகுமார் (27) ஆகிய நான்கு பேர் கைது செய்யப்பட்டனர். அவர்கள் மீது குண்டர் சட்டமும் பாய்ந்துள்ளது.

மேலும், இந்த சம்பவத்தில் அரசியல் கட்சியினருக்கும், முக்கிய புள்ளிகளுக்கும் தொடர்பிருப்பதாக தகவல்கள் வெளியாகிவருகின்றன. இதற்கிடையே இதுதொடர்பான வழக்கை சிபிசிஐடிக்கு மாற்ற வேண்டும் என பல்வேறு தரப்பினர் வலியுறுத்திவந்தனர்.

இந்நிலையில், பொள்ளாச்சியில் பெண்களை பாலியல் துன்புறுத்தல் செய்த விவகாரம் தொடர்பான வழக்கை சிபிசிஐடிக்கு மாற்றி தமிழக காவல் தலைமை இயக்குநர் தே.க.ராஜேந்திரன் உத்தரவிட்டுள்ளார்.