எதிர்க்கட்சிகளின் போராட்டத்திற்கு போலீசார் அனுமதி மறுப்பு!

டெல்லியில் நடைபெற்று வரும் விவசாயிகளின் போராட்டத்திற்கு ஆதரவு தெரிவிக்கும் வகையில் திமுக உள்ளிட்ட எதிர்க்கட்சிகள் நடத்த உள்ள போராட்டத்திற்கு காவல்துறையினர் அனுமதி மறுத்துள்ளனர்.

சென்னை:வேளாண் சட்டங்களை திரும்பப் பெறக் கோரி, கடந்த இரண்டு வாரங்களுக்கும் மேலாக டெல்லியில் விவசாயிகள் தொடர் போராட்டம் நடத்தி வருகின்றனர். போராட்டத்திற்கு ஆதரவு தெரிவிக்கும் வகையில், திமுக உள்ளிட்ட எதிர்க்கட்சிகள் நாளை (டிசம்பர் 18) தமிழ்நாடு முழுவதும் போராட்டம் நடத்த இருப்பதாக அறிவித்திருந்தனர்.

அனுமதி மறுப்பு

திமுக தலைவர் ஸ்டாலின் உள்பட எதிர்க்கட்சி தலைவர்கள், சென்னை வள்ளுவர் கோட்டத்தில் நடைபெற உள்ள போராட்டத்தில் கலந்து கொள்வதாக தெரிவிக்கப்பட்டிருந்தது. இந்தநிலையில், இந்த போராட்டத்திற்கு, சென்னை மாநகர காவல் துறையினர் அனுமதி தர மறுத்துள்ளனர்.

144 தடை

ஏற்கனவே, தொற்றுநோய் தடுப்பு சட்டம் மற்றும் சென்னை காவல் துறையின் கட்டுப்பாட்டில் உள்ள பகுதிகளில் 144 தடை உத்தரவு அமலில் உள்ளது. தமிழ்நாடு அரசு அறிவித்துள்ள கரோனா ஊரடங்கு தளர்வுகளில், பொது இடங்களில் ஒன்று கூடி போராட்டம், ஆர்ப்பாட்டம் நடத்த இன்னும் தடை உள்ளதாலும் அனுமதி மறுக்கப்பட்டதாக காவல்துறை தரப்பில் இருந்து தெரிவிக்கப்படுகிறது.

இதையும் படிங்க:நாளை திட்டமிட்டபடி திமுக உண்ணாவிரத போராட்டம் நடைபெறும் - டிகேஎஸ் இளங்கோவன்!