’நலவாரியங்களில் இன்றே விண்ணப்பித்தாலும் இனி நிவாரணம் பெறலாம்’

சென்னை: நலவாரியங்களில் இதுவரை பதிவு செய்யாத தொழிலாளர்கள் தற்போது பதிவு செய்தால்கூட, எதிர்வரும் காலங்களில் அரசின் நிவாரண உதவிகள் வழங்கப்படும் என தமிழ்நாடு அரசு உயர் நீதிமன்றத்தில் உறுதி அளித்துள்ளது.

நல வாரியங்களில் பதிவு செய்யப்படாத பிற தொழிலாளர்களுக்கும் நிவாரண உதவி வழங்கக்கோரி கட்டுமான தொழிலாளர் சங்கம், ஆட்டோ ஓட்டுநர்கள் சங்கம் உள்ளிட்ட சங்கங்களின் சார்பில் உயர் நீதிமன்றத்தில் வழக்குகள் தொடரப்பட்டிருந்தன.

இந்த வழக்குகள் நீதிபதிகள் சுந்தரேஷ், ஹேமலதா அடங்கிய அமர்வில் இன்று மீண்டும் விசாரணைக்கு வந்தது. அப்போது, மனுதாரர்கள் சார்பில் ஆஜரான வழக்கறிஞர்கள், கரோனா ஊரடங்கு சூழலில் அனைத்து தரப்பட்ட தொழிலாளர்களும் பாதிக்கப்பட்டுள்ளதாகத் தெரிவித்தனர். எனவே, நலவாரியங்களில் பதிவை புதுப்பிக்காதவர்களுக்கும், பதிவு செய்யாதவர்களுக்கும் நிவாரண உதவியாக 5,000 ரூபாய் வழங்க உத்தரவிட வேண்டும் என கோரிக்கை விடுத்தனர்.

அரசு தரப்பில் ஆஜரான தலைமை வழக்கறிஞர் விஜய் நாராயண், பதிவு செய்யப்பட்டுள்ள கட்டுமான தொழிலாளர்களுக்கு ஏப்ரல், மே மாதங்களில் தலா 1000 ரூபாய் என 2000 ரூபாய் வழங்கப்பட்டுள்ளதாகவும், இது தவிர சென்னை, காஞ்சிபுரம், திருவள்ளூர், செங்கல்பட்டு உள்ளிட்ட 4 மாவட்டங்களை சேர்ந்த கட்டுமான தொழிலாளர்களுக்கு முழு ஊரடங்கு பிறப்பிக்கப்பட்டதன் காரணமாக, ஜூன் மாதத்தில் 1000 ரூபாய் வழங்கப்பட்டுள்ளதாகவும் தெரிவித்தார்.

அது தவிர அனைத்து குடும்ப அட்டைதாரர்களுக்கும் தலா 1000 ரூபாய் வழங்கப்பட்டுள்ளதாகவும், பதிவு செய்யப்பட்ட மற்றும் பதிவு செய்யப்படாத தொழிலாளர்கள் என இருதரப்புமே இதில் பயன் பெற்றிருக்கக்கூடும் எனவும் தெரிவித்தார்.

மேலும், 12.13 லட்சம் பேர் உறுப்பினர்களாக உள்ள கட்டுமான தொழிலாளர் நல வாரியத்தில் இருந்த 3200 கோடி நிதியிலிருந்து 343 கோடி ரூபாய் கரோனா காலத்தில் நிவாரண உதவியாக வழங்கப்பட்டுள்ளதாக தெரிவித்த அவர், பதிவு செய்யப்படாத தொழிலாளர்களுக்கும் நிதியுதவி வழங்குவதாக இருந்தால், அது தவறாக பயன்படுத்திக்கொள்ள வாய்ப்புள்ளதாக சுட்டிக்காட்டினார்.

கட்டுமானத் துறையில் 50 லட்சம் பேர், இதர துறைகளில் ஒரு கோடி பேர் என மொத்தம் ஒன்றரை கோடி பேர் பதிவு செய்யப்படாத தொழிலாளர்களாக இருப்பார்கள் என அரசு கருதுவதாக தெரிவித்த அவர், இதுவரை பதிவு செய்து கொள்ளாத தொழிலாளர்கள் இன்றேகூட ஆன்லைன் மூலம் விண்ணப்பித்து கொள்ளலாம் எனவும், அப்படி விண்ணப்பிக்கும் பட்சத்தில் ஆகஸ்ட் மாதத்திலிருந்து அரசு வழங்கும் நிவாரண உதவிகள் அவர்களுக்கு கிடைக்கும் எனவும் உறுதியளித்தார்.

ஏராளமான நிதியை கரோனா தடுப்பு நடவடிக்கைக்காக செலவு செய்து வரும் இந்த எதிர்பாரா சூழலில், அரசுக்கும் கடுமையான நிதி நெருக்கடி இருப்பதாகவும் அரசு தலைமை வழக்கறிஞர் தெரிவித்தார். இதையடுத்து, வழக்கு விசாரணை ஜூலை 30 ஆம் தேதிக்கு ஒத்திவைக்கப்பட்டது.

இதையும் படிங்க: கறுப்பர் கூட்டத்தை சேர்ந்த மேலும் ஒருவர் மீது குண்டர் சட்டம்