சென்னை : 12 ம் வகுப்பு முடித்தவர்கள், நுழைவுத் தேர்வு மூலம் பிஆர்க் பட்டப்படிப்புக்கு தேர்வு செய்யப்படுகின்றனர். பிஆர்க் பட்டப்படிப்பில் 2016-17 ம் கல்வியாண்டில் அண்ணா பல்கலைக் கழகத்தில் அனுமதிக்கப்பட்ட 117 இடங்களிலும், 2017-18 ம் கல்வியாண்டில் 118 இடங்களிலும், 2018-19 கல்வியாண்டில் 118 இடங்களிலும் ஒரு அரசுப் பள்ளி மாணவரும் சேரவில்லை.
2019-20 ம் கல்வியாண்டில் 66 இடங்களில் ஒரே ஒரு அரசுப் பள்ளி மாணவர் மட்டுமே சேர்ந்துள்ளார். 2020-21 ம் கல்வியாண்டில் அரசுப் பள்ளி மாணவர்கள் ஒருவரும் சேரவில்லை.
3 மாணவர்கள் சேர்க்கை
அரசு உதவி பெறும் கல்லூரிகளில் 5 ஆண்டுகளில் 3 மாணவர்கள் மட்டும் சேர்ந்துள்ளனர். சுயநிதி பொறியியல் கல்லூரியில் 5 ஆண்டுகளில் 84 பேர் மட்டுமே சேர்ந்துள்ள அதிர்ச்சி தகவல் வெளியாகி உள்ளது.
அரசுப் பள்ளி மாணவர்கள் சுயநிதி பொறியியல் கல்லூரிகளில் 2016-17 ம் கல்வியாண்டில் 1899 இடங்களில் 20 பேரும், 2017-18 கல்வியாண்டில் 2098 இடங்களில் 8 பேரும் சேர்ந்துள்ளனர்.
2018-19 ம் கல்வியாண்டில் 1787 இடங்களில் 12 பேரும், 2019-20 ம் கல்வியாண்டில் 1738 இடங்களில் 24 பேரும், 2020-21 ம் கல்வியாண்டில் 1738 இடங்களில் 20 பேரும் சேர்ந்துள்ளதாக தகவல் வெளியாகி உள்ளது.