மருத்துவக் கல்வித் துறையில் பல்வேறு மாற்றங்களை உருவாக்கும் வகையில் தேசிய மருத்துவ ஆணைய மசோதா என்ற புதிய மசோதாவைக் கடந்த திங்கள் கிழமை மத்திய அரசு நிறைவேற்றியது. இந்திய மருத்துவ கழகத்தைக் கலைத்து தேசிய மருத்துவ ஆணையம் அமைக்கப்படும் மற்றும் நெக்ஸ்ட் தேர்வு நடத்தப்படும் உள்ளிட்ட பல அம்சங்கள் இந்த மசோதாவில் இடம்பெற்றிருந்தன. இந்த மசோதாவிற்கு மருத்துவத் துறையினர் பலரும் எதிர்ப்பு தெரிவித்திருந்தனர்.
இந்நிலையில், இம்மசோதாவை எதிர்த்து இந்திய மருத்துவ சங்கம் நாடு முழுவதும் 24 மணி நேர வேலைநிறுத்தப் போராட்டத்தில் ஈடுபடப் போவதாக அறிவித்திருந்தது. இதனைத் தொடர்ந்து, இந்திய மருத்துவ சங்கத்தின் அறிவிப்பை ஏற்று தமிழ்நாட்டில் பல்வேறு மருத்துவமனையைச் சேர்ந்த மருத்துவர்களும் மாணவர்களும் போராட்டத்தில் ஈடுபட்டனர்.
சேலம்: அனுபவமில்லாத மருத்துவர்களை மருத்துவமனைகளில் பணிக்கு அமர்த்தும் இந்த ஆணையத்தை எதிர்ப்பதாகக் கூறி சேலம் இந்திய மருத்துவ சங்க அலுவலக வளாகத்தில் அரசு மற்றும் தனியார் மருத்துவமனை மருத்துவர்கள் கண்டன ஆர்ப்பாட்டம் நடத்தினர். மத்திய அரசு மசோதாவை திரும்ப் பெற வேண்டும் எனவும் வலியுறுத்தினர்.
சேலத்தில் நடந்த போராட்டம் திருவாரூர்: தேசிய மருத்துவ ஆணைய மசோதாவுக்கும், நெக்ஸ்ட் தேர்வுக்கும் எதிர்ப்பு தெரிவித்து திருவாரூர் அரசு மருத்துவக் கல்லூரி முன்பு 300க்கும் மேற்பட்ட மருத்துவ மாணவர்கள் மனிதச் சங்கிலி போராட்டத்தில் ஈடுபட்டனர்.
திருவாரூர் மருத்துவ மாணவர்கள் மனிதச் சங்கிலி போராட்டத்தில் ஈடுபட்டனர் திருப்பூர்: மத்திய அரசு முன்வைத்துள்ள தேசிய மருத்துவ ஆணைய மசோதா நிறைவேற்றப்பட்டால் தற்போதுள்ள மருத்துவர்களும் , மருத்துவ மாணவர்களும் பாதிக்கப்படுவர் எனவும், மசோதாவைத் திரும்பப் பெற வேண்டும் எனவும், மாணவர்களின் மருத்துவக் கனவை கலைக்கக் கூடிய நீட் , நெக்ஸ்ட் தேர்வுகளை நீக்க வேண்டும் என்பதையும் வலியுறுத்தி இந்திய மருத்துவ சங்கத்தின் திருப்பூர் மாவட்டக்கிளை சார்பில் 150க்கும் மேற்பட்ட மருத்துவமனைகளில் 600க்கும் மேற்பட்ட மருத்துவர்கள் வேலை நிறுத்த போராட்டத்தில் ஈடுபட்டனர்.
திருப்பூரில் நடந்த போராட்டம் தென்காசி: மத்திய அரசு நிறைவேற்றிய இந்த மசோதாவால் பல போலி மருத்துவர்கள் உருவாக வழிவகுக்கும் என்பதால் மசோதாவை நீக்க வேண்டும் எனக் கூறி குற்றாலம் இந்திய மருத்துவ சங்கத்தைச் சேர்ந்தவர்கள் வேலை நிறுத்தப் போராட்டத்தில் ஈடுபட்டனர். மேலும், தென்காசி கோட்டாட்சியரிடம் தங்களது கோரிக்கைகளை மனுவாக அளித்தனர்.
தென்காசியில் நடந்த போராட்டம் நாமக்கல்: இந்திய மருத்துவ சங்கத்தின் நாமக்கல் கிளையைச் சேர்ந்த மருத்துவர்கள் கண்களில் கருப்பு நிற துணி கட்டி போராட்டத்தில் ஈடுபட்டனர்.மேலும், மசோதாவை திரும்ப பெற வேண்டும் எனக் கூறி போராட்டம் நடத்தினர்.
நாமக்கல் கிளையினர் நடத்திய போராட்டம் வேலைநிறுத்தப் போராட்டம் நடைபெற்றாலும் அவசரகால மருத்துவ சிகிச்சைகள் வழக்கம் போல் நடைபெறும் என்று இந்திய மருத்துவ சங்கம் அறிவித்திருந்தது குறிப்பிடத்தக்கது.
