கால்நடை மருத்துவ அறிவியல் படிப்பில் 12ஆம் வகுப்பு மதிப்பெண்கள் அடிப்படையில் சேரலாம்!

தமிழ்நாடு கால்நடை மருத்துவ அறிவியல் பல்கலைக்கழகத்தின் இளநிலைப் படிப்புகளில் சேர்வதற்கு வரும் 26ஆம் தேதி வரை ஆன்லைன் மூலம் விண்ணப்பிக்கலாம் என அறிவிக்கப்பட்டுள்ளது.

சென்னை:வரும் 26ஆம் தேதி வரையில் தமிழ்நாடு கால்நடை மருத்துவ அறிவியல் பல்கலைக்கழகத்தின் இளநிலை படிப்புகளில் சேர்வதற்கு ஆன்லைன் மூலம் விண்ணப்பிக்கலாம் என அறிவிக்கப்பட்டுள்ளது.

மேலும், கால்நடை மருத்துவப் படிப்புகள் 12ஆம் வகுப்பு தேர்வு மதிப்பெண்கள் அடிப்படையில் வழங்கப்படுகின்றன. ஆன்லைன் பதிவு தொடங்கிய முதல் நாளிலேயே 1500-க்கும் அதிகமான மாணவர்கள் பதிவு செய்தனர். தமிழ்நாடு கால்நடை மருத்துவ அறிவியல் பல்கலைக்கழகத்தால், கால்நடை மருத்துவம் மற்றும் கால்நடை பராமரிப்பு பட்டப்படிப்பு (பிவிஎஸ்ஸி ஏஎச்) 4 ஆண்டு 6 மாதம் படிப்பும், 1 ஆண்டு உள்ளிருப்புப்பயிற்சியும் வழங்கப்படும். இதில் 580 இடங்கள் உள்ளன.

சென்னை கால்நடை மருத்துவக்கல்லூரியில் 120 இடங்கள், நாமக்கல், திருநெல்வேலி, தஞ்சாவூர் கால்நடை மருத்துவக் கல்லூரி மற்றும் ஆராய்ச்சி நிலையங்களில் தலா 100 இடங்கள், சேலம் கால்நடை மருத்துவக்கல்லூரி மற்றும் ஆராய்ச்சி நிலையம், தலைவாசல் கூட்டுரோடு ஆகியவற்றில் 80 இடங்கள், தேனி, உடுமலைப்பேட்டை கால்நடை மருத்துவக் கல்லூரி மற்றும் ஆராய்ச்சி நிலையத்தில் தலா 40 இடங்களில் மாணவர்கள் சேர்க்கை நடைபெறும்.

பி.டெக் உணவுத் தொழில்நுட்ப பட்டப்படிப்பில் கொடுவளியில் உணவு மற்றும் பால்வளத் தொழில்நுட்பக் கல்லூரியில் 40 இடங்கள், கோழியின தொழில்நுட்ப பட்டப்படிப்பு ஓசூர் கோழியின உற்பத்தி மற்றும் மேலாண்மைக் கல்லூரியில் 40 இடங்கள், பால்வளத் தொழில்நுட்ப பட்டப்படிப்பில் கொடுவளியில் 20 இடங்களில் மாணவர்கள் சேர்க்கப்படுவார்கள்.

இந்தப் படிப்புகளில் சேர்வதற்கு https://adm.tanuvas.ac.inஎன்ற இணையதளத்தில் 26ஆம் தேதி மாலை 5 மணி வரையில் விண்ணப்பிக்கலாம். இந்தப்படிப்பிற்கு 1500-க்கும் அதிகமான மாணவர்கள் விண்ணப்பித்திருக்கின்றனர் என துணைவேந்தர் செல்வகுமார் தெரிவித்தார்.

இதையும் படிங்க: தகுதிச்சான்று வழங்குதல் தற்காலிகமாக நிறுத்தம்: தமிழ்நாடு எம்ஜிஆர் மருத்துவப்பல்கலைக்கழகம் அறிவிப்பு