சென்னை ராஜீவ் காந்தி அரசு மருத்துவமனையில் திடீர் தீ விபத்து

சென்னை ராஜீவ் காந்தி அரசுப் பொது மருத்துவமனையில் தீ விபத்து ஏற்பட்டுள்ளது. 5 மாதங்களில் 2ஆவது முறையாக தீ விபத்து ஏற்பட்டுள்ளது.

சென்னை ராஜீவ் காந்தி அரசு மருத்துவமனையில் உள்ள கரோனா வார்டில் இன்று (ஆக.27) அதிகாலை 3:30 மணியளவில் திடீரென தீ விபத்து ஏற்பட்டது. உடனடியாக மருத்துவமனை ஊழியர்கள் தீயணைப்புத்துறைக்கு தகவல் கொடுத்தனர். அதனடிப்படையில் 3 வாகனங்களுடன் சம்பவயிடத்திற்கு விரைந்த தீயணைப்பு வீரர்கள் தீயை அணைத்தனர்.

இதனிடையே அந்த வார்ட்டின் தீவிர சிகிச்சை பிரிவில் இருந்த 5 நோயாளிகள் வேறு வார்டிற்கு மாற்றப்பட்டனர். இந்த விபத்தில் உயிரிழப்புகள் ஏதுமில்லை. மருத்துவ உபகரணங்கள் மட்டும் தீக்கிரையாகின. இந்த சம்பவம் தொடர்பாக, ராஜீவ்காந்தி அரசு மருத்துவமனை போலீசார் வழக்குப்பதிவு செய்து விசாரணை மேற்கொண்டு வருகின்றனர்.

முதல்கட்ட விசாரணையில் ஏசியில் ஏற்பட்ட மின் கசிவு காரணமாக தீ விபத்து ஏற்பட்டிருக்கலாம் என்பது தெரியவந்துள்ளது. கடந்த ஏப்ரல் மாதம் 27ஆம் தேதி ராஜீவ் காந்தி அரசு மருத்துவமனையில் சிலிண்டர் குடோனில் பெரும் தீ விபத்து ஏற்பட்டது குறிப்பிடத்தக்கது.

இதையும் படிங்க: மயிலாடுதுறையில் 54 சவரன் தங்க நகைகள், ஒன்றரை கிலோ வெள்ளி திருட்டு