செப்டம்பரில் 23% உயர்வு கண்ட ஜி.எஸ்.டி வசூல்

செப்டம்பர் மாதத்தில் சரக்கு மற்றும் சேவை வரி வசூல் ரூ.1.17 லட்சம் கோடியை எட்டியுள்ளதாக என ஒன்றிய நிதியமைச்சகம் கூறியுள்ளது.

செப்டம்பர் மாதத்திற்கான சரக்கு மற்றும் சேவை வரி வசூல் குறித்த புள்ளி விவரத்தை ஒன்றிய நிதியமைச்சகம் வெளியிட்டுள்ளது. அதன்படி, கடந்த மாதத்தில் ஒட்டுமொத்த ஜிஎஸ்டி வசூல் ரூ.1.17 லட்சம் கோடி எனத் தெரிவிக்கப்பட்டுள்ளது.

கடந்தாண்டை ஒப்பிடுகையில் இந்தத்தொகை 23 விழுக்காடு அதிகமாகும். 2020ஆம் ஆண்டு செப்டம்பர் மாதம் ஜி.எஸ்.டி. வசூல் 91 ஆயிரத்து 916 கோடி ரூபாயாக இருந்தது. இந்தாண்டு சுமார் 23 லட்சம் கோடி ரூபாய் கூடுதலாக வசூலாகியுள்ளது.

செப்டம்பர் மாத புள்ளிவிவரப்படி, ஒருங்கிணைந்த ஜிஎஸ்டி தொகை ரூ.60,911 கோடியாகவும், மத்திய ஜிஎஸ்டி ரூ.28,512 கோடியாகவும், மாநில ஜிஎஸ்டி ரூ.24,140 கோடியாகவும் கணக்கிடப்பட்டுள்ளது. செஸ் வரியாக ரூ.8,754 கோடி வசூல் செய்யப்பட்டுள்ளது.

தொடரும் பொருளாதார முன்னேற்றம்

பொருளாதார வளர்ச்சி, போலி பயனாளர்கள் நீக்கம், வரி எய்ப்பவர்களை கண்டறிதல் போன்ற நடவடிக்கை காரணமாக ஜிஎஸ்டி வசூல் நல்ல வளர்ச்சியைக் கண்டுள்ளது. தொடர்ந்து சில மாதங்களாக ஜிஎஸ்டி வசூல் சிறப்பாகவுள்ளது பொருளாதாரம் மீண்டுவருவதை குறிக்கிறது என நிதியமைச்சகம் தெரிவித்துள்ளது.

இந்த நிதியாண்டின் முதல் காலாண்டில் சராசரி மாத வசூல் ரூ.1.10 லட்சம் கோடியாக இருந்தது. இரண்டாம் காலாண்டில் இந்த சராசரித்தொகை ரூ.1.15 லட்சம் கோடியாக உயர்ந்துள்ளது. இனிவரும் மாதங்களிலும் இது அதிகரிக்கும் என நிதியமைச்சகம் தெரிவித்துள்ளது.

இதையும் படிங்க:வாகனத்திற்கான ஆவணங்கள் செல்லுபடியாகும் காலம் அக்., 31 வரை நீட்டிப்பு