சர்வதேச அளவில் ஒவ்வொரு பெண் குழந்தைக்கும் கல்வி, அடிப்படை உரிமை காக்கப்பட வேண்டும் என்பதை அறிவுறுத்தும் விதமாக ஜூலை 12ஆம் தேதி உலகளவில் மலாலா தினம் கொண்டாடப்படும் என 2013ஆம் ஆண்டில் ஐ.நா. சபை அறிவித்தது.
உலக அளவில் கல்வி உரிமையை நிலைநாட்டுவதற்கான விழிப்பு உணர்வை வலுப்படுத்தும் வகையில் இந்த தினம் கொண்டாடப்படும் அளவுக்கு அப்படி என்ன செய்தார் மலாலா?
அடிப்படைவாதிகளுக்கும் ஆயுததாரிகளுக்கும் இடையே அகிம்சை வழியில் அவர் பெண்களின் உரிமைக்காக போர்க்குரல் எழுப்பியது ஒன்றே போதாதா?!
உலகளவில் 6 கோடியே 10 லட்சம் பெண் குழந்தைகள் பள்ளிக்குச் செல்ல முடியாத அவல நிலையில் வாடும்போது, அதில் ஒருவராக இருந்த மலாலா அந்த நிலையில் இருந்து தானும் மீண்டு, மற்றவர்களையும் மீட்கும் வரலாற்று கடமையை செய்து வருகிறார்.
2003 முதல் 2009ஆம் ஆண்டு வரையிலான காலகட்டத்தில் மத அடிப்படைவாத, பயங்கரவாத அமைப்பான தலிபான் பயங்கரவாதிகளின் ஆதிக்கத்தில் பாகிஸ்தானின் ஸ்வாட் பள்ளத்தாக்குப் பகுதி மக்கள் அவதியுற்று வந்தனர். குறிப்பாக, அவர்களின் ஆதிக்கத்தின் காரணமாக 200க்கும் மேற்பட்ட பெண்கள் பள்ளிகளில் குண்டு வைத்து தகர்க்கப்பட்டனர்.
இதனால், 50 ஆயிரம் மாணவர்கள் பாதிப்புக்குள்ளாகினர். பெண்கள் கல்வி உரிமை முற்றும் முழுதாகப் பாதிக்கப்பட்டது.
இக்கொடுமைகளை எதிர்த்து 2009ஆம் ஆண்டில் தன் எழுத்தின் மூலம் தலிபான்களின் அட்டகாசங்களை உலகுக்கு வெளிச்சம்போட்டு காட்டியதே உலகிற்கு மலாலா யாரென காட்டியது.
அப்போது வெறும் 11 வயதேயான சிறுமி மலாலாவுக்கு எழுத்தின் மீது தீராத காதல் இருந்தது. அவற்றை தனது டைரிக் குறிப்பாக தொகுத்து வைத்திருக்கும் பழக்கமாக அவர் மாற்றியிருந்தார்.
சீருடை அணியாமல், சாதாரண உடை அணிந்து, புத்தகங்களை மறைத்துக் கொண்டு பள்ளிக் கூடம் சென்று வந்த மலாலாவின் ஒவ்வொரு எழுத்தும் தலிபான்கள் இழைத்துக்கொண்டிருக்கும் கொடுமைகளை ஆவணப்படுத்தி இருந்தது.
தனது தேசத்தில் நடக்கும் கொடுமைகளை சர்வதேசம் அறிய வேண்டுமென நினைத்த அவர், அதனை தொகுத்து 'நான் அச்சப்படுகிறேன்' என்ற தலைப்பில் கட்டுரைகளாக மாற்றி பி.பி.சி. உருது மொழிப் பிரிவுக்கு புனைப்பெயரில் அனுப்பி வைத்தார். அந்த கட்டுரைகளில் உள்ள எழுத்துக்களின் வீரியம் உணரப்பட்டதால், அவற்றை தொடராக வெளியிட்டது பி.பி.சி செய்தி நிறுவனம்.
இந்த ஆவணமே அடுத்த மூன்றாண்டுகளில் ஸ்வாட் பகுதியில் இருந்து தலிபான்கள் விரட்டி அடிக்கப்படுவதற்கு அடித்தளமாக மாறியது.
அதுவரை உலகிற்கு யாரென தெரியாத அந்தச் சிறுமியை 'நியூயார்க் டைம்ஸ்' ஆவணப் படம் வெளிப்படுத்தியது.
ஹிட்லரின் வெறிச் செயல்களைத் தனது டைரிக் குறிப்புகள் மூலம் வரலாற்றுப் பதிவாக்கிய ஜெர்மானிய சிறுமி ஆன்னி ஃபிராங்க்கின் மறுபிறப்பாக போற்றப்பட்ட மலாலாவின் முகத்தை முதன்முறையாக உலகமே பார்த்தது.
உண்மையில், இந்த சின்னஞ்சிறு சிறுமி தான் இந்தக் கட்டுரைகளை எழுதினாளா? என்ற வியப்பு ஒரு பக்கம், இனி அவளுக்கு வரப்போகும் ஆபத்துகள் குறித்து ஆழ்ந்த சிந்தனை இன்னொரு பக்கம் உலகத்திற்கு எழுந்தது.
மலாலா மீது அக்கறை கொண்டவர்கள் நினைத்ததுபோல, தலிபான்களின் 'எதிரியாக' அவர் காலத்தால் மாறியிருந்தார். மலாலாவை தங்களது 'குறி' வைப்பிற்குள் வைத்திருந்தது தலிபான் அமைப்பு.
அவளை கொல்ல சதித்திட்டம் தீட்டிய தலிபான்கள், பாகிஸ்தானின் மின்கோரா அருகே உள்ள பள்ளி வாகனத்தில் திரும்பிக் கொண்டிருந்தபோது மலாலா மீது காட்டுமிராண்டித்தனமான தாக்குதலைத் தொடுத்தது.
தலை முதல் கால் வரை தோட்டாக்களால் துளைக்கப்பட்ட மலாலா படுகாயத்துடன் உயிருக்குப் போராடியபடி மயக்க நிலையில் கிடந்தார்.
இது குறித்து தகவலறிந்த பாகிஸ்தான் ராணுவம், உயிருக்குப் போராடிய நிலையிலிருந்த மலாலாவைக் காப்பாற்றி மருத்துவமனையில் அனுமதித்தனர்.
உரிமைக்காகப் போராடிய சின்னஞ்சிறு சிறுமி உயிருக்குப் போராடுவதை அறிந்த உலக மக்களுக்கு தலிபான்கள் போன்ற பயங்கரவாத அமைப்புகள் மீதான கோபமும் மிகுதியானது.
சர்வதேச சமூகம், சமூக ஆர்வலர்கள், பெண்கள், மாணவர்கள் என அனைத்துத் தரப்பினரும் இந்த காட்டுமிராண்டித்தனமான தாக்குதலைக் கண்டனக் குரல் எழுப்பி, எதிர்த்தனர்.
'மதச்சார்பற்றவளாக செயல்பட்டு மத நெறிமுறைகளை மீறி, பெண் கல்விக்காகக் குரல் கொடுத்ததால், மலாலாவைத் தாக்கினோம்' என்று தலிபான் அமைப்பு விளக்கம் தந்தது.
இதனிடையே, மலாலாவுக்கு சிறப்பு சிகிச்சை அளிக்க இங்கிலாந்து அரசு ஏற்பாடு செய்தது. நினைவு இழந்த நிலையில் சிறப்பு விமானம் மூலமாக லண்டன் அழைத்துச் செல்லப்பட்ட மலாலாவின் உயிரை மருத்துவர்கள் போராடி மீட்டனர்.
உயிர் பிழைத்த மலாலா 'இனி, தானுண்டு; தன் வாழ்வுண்டு' என தனக்கு கிடைத்த செல்வாக்கை வைத்து ஏதோ ஒரு வெளிநாட்டில் மீதமுள்ள, தன் வாழ்வை சொகுசாக கழிப்பார் எனப் பலரும் நினைத்தனர். ஆனால், மலாலாவோ இப்போது இன்னொரு அதிர்ச்சிகரமான செய்தியை உலகிற்கு சொன்னார்.
தன்னுயிருக்கு ஆபத்தான பாகிஸ்தானுக்கே மீண்டும் செல்ல முடிவெடுத்திருப்பதாக அவர் அறிவித்தது, லட்சக்கணக்கான உள்ளங்களில் மலாலாவுக்கு நீங்காத இடத்தைப் பெற்றுத் தந்தது.
ஆசியாவிலேயே பெண் கல்வியில் பின்தங்கி இருக்கும் பாகிஸ்தானை 'கல்விக்கு முன்னுரிமை அளிக்கும் தேசமாக மாற்ற' உழைப்பேன் என்ற அவரது பிரகடனமும், அந்த கனவை நோக்கிய அவரது பயணமும் ஐ.நா.வின் அங்கீகாரத்தைத் தேடித் தந்தது.
மலாலாவின் தைரியத்தைக் கொண்டாடியது, பாகிஸ்தான். அந்நாட்டின் இளம் அமைதியாளருக்கான முதல் விருதை வழங்கி, அவரை அங்கீகரித்தது பாகிஸ்தான் அரசு.
பெண் கல்விக்காகப் போராடும் அவருக்கு, ஐ.நா.வின் சிறப்பு தூதர் அங்கீகாரம், நோபல் பரிசு என சர்வதேச அரங்கில் பாராட்டுக்களும் பரிசுகளும் குவிந்தன.
கல்வி கிடைப்பதற்காக மேற்கொள்ளப்பட்டு வரும் விழிப்பு உணர்வை வலுப்படுத்துவதே நோக்கமாக கொண்டு செயலாற்றிவரும் மலாலாவின் பிறந்த நாளான ஜூலை 12ஆம் தேதியை ஐ.நா மன்றம் மலாலா தினமாக அறிவித்தது.
அண்மையில், ஆக்ஸ்போர்டு பல்கலைக்கழகத்தில் தத்துவ அரசியல் மற்றும் பொருளாதாரம் பாடப்பிரிவில், தனது பட்டப்படிப்பைப் பெற்ற மலாலா, உலகளாவிய பெண்களின் கல்வி உரிமையை உறுதி செய்ய, மலாலா அறக்கட்டளையை நிறுவி, மக்கள் பணியாற்றி வருகிறார்.
நாடு, மொழி, மதங்கள் கடந்து ஒடுக்கப்படும் பெண்கள் இப்போது உலகம் முழுவதும் 'நானும் மலாலா தான்!' என தங்களது உரிமைக்காக ஓங்கி குரல் கொடுத்து, ஓரணியில் திரண்டு கொண்டிருக்க, இந்த நூற்றாண்டின் காரணமான கலகக்காரி மலாலாவுக்கு நேற்றுடன்(ஜூலை 12) 23 வயது நிறைவடைந்து, 24ஆவது வயது தொடங்குகிறது... இன்னும் சாதிக்கட்டும் கலகக்காரி!
