கன்னியாகுமரி, நாகர்கோவில் கணேசபுரத்தைச் சேர்ந்தவர் இளைஞர், காசி. இவர் இளம் பெண்களை ஆபாசப்படம் எடுத்து, மிரட்டி பணம் பறித்ததாக, எழுந்தப் புகாரில் கைது செய்யப்பட்டார். கோட்டார் காவல் துறை இதுகுறித்து விசாரித்து வந்த நிலையில் காசி, அவரது கூட்டாளிகள் சேர்ந்து மேலும் பல பெண்களை மிரட்டி, பணம் பறித்து இருப்பது தெரியவந்தது.
இது தொடர்பாக காசி மீது ஆறு பேர் அடுத்தடுத்து புகார்கள் அளித்தனர். இதைத் தொடர்ந்து இந்த வழக்கு சிபிசிஐடி காவல் துறையினருக்கு மாற்றப்பட்டது. அவர்கள் நடத்திய விசாரணையில் காசியின் நெருங்கிய கூட்டாளி தினேஷ் என்பவர், கடந்த சில நாள்களுக்கு முன்பு கைது செய்யப்பட்டார்.
தினேஷ் பெண்களுடன் ஆபாசமாக இருக்கும் படங்களை அந்தப் பெண்களுக்கு அனுப்பி, அவர்களை மிரட்டி பலாத்காரம் செய்ததாக காவல் துறை விசாரணையில் தெரிய வந்தது. மேலும், காவல் துறை விசாரணையில், காசியின் நெருங்கிய நண்பர்கள் மேலும் சிலர் இதுபோன்ற செயல்களில் ஈடுபட்டு இருப்பது தெரியவந்துள்ளது.
எனவே, அவர்களையும் கைதுசெய்ய காவல் துறையினர் தீவிரமாக முயற்சித்து வருகின்றனர். இதில் ஒருவர் சிக்கியுள்ளதாகக் கூறப்படுகிறது. அவரை சிபிசிஐடி காவல் துறையினர் பிடித்து ரகசிய இடத்தில் வைத்து, விசாரணை நடத்தி வருகிறார்கள். இதில் மேலும் பல ரகசிய தகவல்கள் வெளியாகும் என்று எதிர்பார்க்கப்படுகிறது.