சிறுமி பாலியல் வன்முறை: மும்பை உயர் நீதிமன்றத்தின் சர்ச்சைக்குரிய தீர்ப்புக்கு உச்ச நீதிமன்றம் இடைக்கால தடை!

டெல்லி: ஆடையை கழற்றாமல் மார்பை தொடுவது போக்சோ சட்டத்தின்படி பாலியல் வன்முறை அல்ல எனக் கூறி, 39 வயது நபரின் சிறைத் தண்டனையை மும்பை உயர் நீதிமன்றம் குறைத்த நிலையில், அதற்கு உச்ச நீதிமன்றம் இடைக்கால தடை விதித்துள்ளது.

கடந்த ஜனவரி 19ஆம் தேதி, சிறாரின் ஆடையைக் கழற்றாமல் மார்பைத் தொடுவது போக்சோ சட்டத்தின் படி பாலியல் வன்முறை அல்ல என மும்பை உயர் நீதிமன்றம் கருத்து தெரிவித்தது. 2 வயது சிறுமியை பழம் தருவதாகக் அழைத்து சென்ற 39 வயது நபர், பாலியல் ரீதியாக துன்புறுத்தி ஆடையை கழற்ற முயற்சித்தார்.

இதுகுறித்த வழக்கில், "ஆடையைக் கழற்றாமல் அவர் பாலியல் ரீதியாக சீண்டியுள்ளார். எனவே, இது போக்சோவின் படி பாலியல் வன்முறை அல்ல. ஆனால், இந்திய தண்டனைச் சட்டம் 354இன் படி பெண்ணை மானபங்கம் செய்வதாகும். போக்சோ சட்டத்தில் கீழ் கடுமையான தண்டனை வழங்கப்படுகிறது. எனவே, இம்மாதிரியான வழக்குகளில் குற்றத்தை நிரூபிப்பதற்கு தகுந்த ஆதாரங்கள் தேவை" என நீதிபதி புஷ்பா கணேடிவாலா குறிப்பிட்டிருந்தார்.

அதுமட்டுமின்றி, குற்றத்தை செய்த 39 வயது நபரின் தண்டனையை ஓராண்டாக குறைத்தார். மும்பை உயர் நீதிமன்றத்தின் தீர்ப்பு பெரும் விமர்சனத்துக்குள்ளானது. இந்நிலையில், இத்தீர்ப்புக்கு உச்ச நீதிமன்றம் இடைக்கால தடை விதித்துள்ளது. அரசின் தலைமை வழக்கறிஞர் கே.கே. வேணுகோபால் இந்தத் தீர்ப்பு குறித்து உச்ச நீதிமன்றத்தில் முறையிட்டிருந்தார்.

இதனைத் தொடர்ந்து, தலைமை நீதிபதி எஸ்.ஏ. பாப்டே, நீதிபதிகள் ஏ.எஸ். போபண்ணா, வி. ராமசுப்பிரமணியம் ஆகியோர் கொண்ட அமர்வு, மகாராஷ்டிரா அரசுக்கு நோட்டீஸ் அனுப்பியுள்ளது. மும்பை உயர் நீதிமன்ற நாக்பூர் கிளையின் தீர்ப்புக்கு எதிராக மேல்முறையீடு செய்ய அரசின் தலைமை வழக்கறிஞருக்கு அனுமதி வழங்கியுள்ளது.