நேஷனல் ஹெரால்டு பத்திரிகையை வெளியிட்ட அசோசியேட்டட் ஜர்னல்ஸ் லிமிடெட் நிறுவனத்தின் சொத்துகள், யங் இந்தியன் பிரைவேட் லிமிடெட் நிறுவனத்திற்கு மாற்றப்பட்டதில் பண மோசடி நடந்ததாகப் புகார் எழுந்தது.
யங் இந்தியன் பிரைவேட் லிமிடெட் நிறுவனத்தில், காங்கிரஸ் தலைவர் சோனியா காந்தி மற்றும் எம்.பி., ராகுல்காந்தி பங்குதாரர்களாக உள்ளனர். இதுதொடர்பாக பாஜக மூத்தத் தலைவர் சுப்பிரமணிய சுவாமி வழக்குத் தொடர்ந்தார். இந்த வழக்கை விசாரித்து வரும் மத்திய அமலாக்கத்துறை, ஜூன் 8ஆம் தேதி ஆஜராகுமாறு சோனியா காந்திக்கு சம்மன் அனுப்பியிருந்தது. ஆனால், கரோனா தொற்று உறுதி செய்யப்பட்டதால், விசாரணைக்கு நேரில் ஆஜராவதிலிருந்து சோனியாகாந்தி விலக்கு கோரியிருந்தார். இதையடுத்து ஜூன் 23ஆம் தேதி ஆஜராக சம்மன் அனுப்பப்பட்டுள்ளது.
இதேபோல் காங்கிரஸ் எம்.பி., ராகுல்காந்திக்கும் ஜூன் 8ஆம் தேதி ஆஜராக சம்மன் அனுப்பப்பட்டிருந்த நிலையில், அவர் வெளிநாட்டில் இருப்பதாகக் கூறி ஆஜராவதிலிருந்து விலக்கு கேட்டார். இதையடுத்து ஜூன் 13ஆம் தேதி ஆஜராக அமலாக்கத்துறை அவகாசம் அளித்துள்ளது. அதன்படி, ராகுல்காந்தி நாளை விசாரணைக்கு ஆஜராக உள்ளார்.
இந்த நிலையில், நேஷனல் ஹெரால்டு வழக்கில் சோனியா காந்திக்கும், ராகுல் காந்திக்கும் அமலாக்கத்துறை சம்மன் அனுப்பியதற்கு காங்கிரஸ் கட்சி கண்டனம் தெரிவித்துள்ளது. நாளை ராகுல்காந்தி ஆஜராகும்போது, அனைத்து மாநிலங்களிலும் அமலாக்கத்துறை அலுவலகங்கள் முன்பு காங்கிரஸ் சார்பில் போராட்டம் நடத்த திட்டமிடப்பட்டுள்ளது.