ஹைதராபாத்:திரிபுரா மாநிலத்தில் மொத்தமுள்ள 60 தொகுதிகளுக்கும் கடந்த மாதம் 16ம் தேதி ஒரே கட்டமாக வாக்குப்பதிவு நடைபெற்றது. நாகாலாந்து, மேகாலயா ஆகிய மாநிலங்களில் கடந்த 27-ம் தேதி சட்டமன்றத் தேர்தல் நடந்தது. மேகாலயாவில் 60 தொகுதிகள் இருந்தாலும், ஐக்கிய ஜனநாயக கட்சி (UDP) வேட்பாளர் மரணம் அடைந்ததால், 59 தொகுதிகளுக்கு மட்டும் தேர்தல் நடத்தப்பட்டது. நாகாலாந்து மாநிலத்தில் மொத்தம் 60 தொகுதிகள் உள்ள நிலையில், ஒரு தொகுதியில் பாஜக வேட்பாளர் போட்டியின்றி வெற்றி பெற்றதால், அங்கும் 59 தொகுதிகளுக்கு மட்டுமே தேர்தல் நடைபெற்றது.
இந்நிலையில், 3 மாநில சட்டமன்றத் தேர்தலிலும் பதிவான வாக்குகள் நாளை (மார்ச் 2) எண்ணப்படுகின்றன. காலை 8 மணிக்கு வாக்கு எண்ணிக்கை தொடங்க உள்ளது. பிற்பகலுக்குள் எந்த கட்சி ஆட்சி அமைக்கப்போகிறது என்பது கிட்டத்தட்ட உறுதியாகிவிடும். வாக்கு எண்ணும் மையங்களில் பலத்த பாதுகாப்பு ஏற்பாடுகள் செய்யப்பட்டுள்ளன.
திரிபுரா: திரிபுரா மாநிலத்தில் பாஜகவைச் சேர்ந்த மாணிக் சாஹா முதலமைச்சராக உள்ளார். நடந்து முடிந்த சட்டமன்றத் தேர்தலில், அங்கு மும்முனை போட்டி நிலவுகிறது. பாஜக - திரிபுரா பூர்வகுடி மக்கள் முன்னணி ஆகிய கட்சிகள் கூட்டணி அமைத்து போட்டியிட்டன. இதேபோல், பாஜகவுக்கு எதிராக காங்கிரஸ் - கம்யூனிஸ்ட் கூட்டணி களம் இறங்கியது. மேலும், திப்ரா மோத்தா கட்சியும் போட்டியிட்டது. தேர்தலுக்கு பிந்தைய கருத்துக்கணிப்புகளின் படி, பாஜக-திரிபுரா பூர்வகுடி மக்கள் முன்னணி கூட்டணி, மொத்தமுள்ள 60 தொகுதிகளில் 32 தொகுதிகளை கைப்பற்றும் எனத் தெரிவிக்கப்பட்டுள்ளது. பெரும்பான்மையை பெற 31 தொகுதிகளில் வெற்றி பெற்றால் போதுமானது.