கேரளாவில் நண்பரின் திருமணத்தில் கலந்துகொள்ள வந்த இருவர் நீரில் மூழ்கி உயிரிழப்பு

கேரளாவில் தனது நண்பர் திருமணத்திற்கு வந்த இளைஞர்கள் இருவர் அணையில் குளித்துக்கொண்டிருந்தபோது நீரில் மூழ்கி உயிரிழந்தனர்.

கேரள மாநிலம், இடுக்கி மாவட்டத்திலுள்ள தொடுபுழாவில் நடைபெற்ற திருமண விழாவில் கலந்து கொள்வதற்காக மணமகனின் நண்பர்கள் நான்கு இளைஞர்கள் தொடுபுழா வந்திருந்தனர்

பின்னர், அவர்கள் அருகிலுள்ள மலங்கரை அணையின் நீர்த்தேக்கப்பகுதியில் குளிப்பதற்காகச் சென்றனர். குளித்துக்கொண்டிருந்தபோது நீரின் ஆழமான பகுதிக்கு நண்பர்களின் ஒருவரான ஃபிர்தேஸ் என்ற இளைஞர் சென்று மாட்டிக்கொண்டார்.

உயிருக்குப் போராடிய நிலையில் இதனைக் கண்ட மற்றொரு நபரான அமன் ஷாபு என்பவர், அவரை காப்பாற்றச்சென்றபோது அவரும் ஆழமான பகுதிக்குச்சென்று மாட்டிக்கொண்டார். இவர்கள் இருவரும் உயிருக்குப் போராடியதைக் கண்ட மற்ற இரண்டு நண்பர்கள் கூச்சலிடவே இதனைப் பார்த்த அப்பகுதி மக்கள் உடனடியாக தீயணைப்பு மற்றும் காவல் துறையினருக்குத் தகவல் தெரிவித்தனர்.

விரைந்து வந்த தீயணைப்பு மற்றும் காவல் துறையினர் நீண்ட போராட்டத்திற்குப் பின்னர் நீரில் மூழ்கிய இருவரையும் மீட்டு, தொடுபுழா அரசு மருத்துவமனையில் சிகிச்சைக்காக அனுப்பி வைத்தனர். அங்கு அவர்களை பரிசோதனை செய்த மருத்துவர்கள் இருவரும் ஏற்கெனவே உயிரிழந்துவிட்டதாகத் தெரிவித்தனர்.

இதனையடுத்து இருவரது உடல்களையும் உடற்கூராய்வுக்குப் பின்னர், அவர்களின் உறவினர்களிடம் உடலை ஒப்படைத்தனர். தொடர்ந்து இச்சம்பவம் குறித்து வழக்குப்பதிவு செய்த காவல் துறையினர் விசாரணை செய்து வருகின்றனர்.

இதையும் படிங்க:கடிதம் எழுதி வைத்து தூக்கிட்டுத் தற்கொலை செய்த நடிகை