எதிர்க்கட்சிகள் பிரதமர் வேட்பாளர் மல்லிஜார்ஜூன கார்கே? ஷாக் கொடுத்த மம்தா, கெஜ்ரிவால்! கார்கே ரியாக்‌ஷன் என்ன?

Mallikarjun Kharg as PM face : டெல்லியில் இந்தியா கூட்டணியில் ஆலோசனைக் கூட்டம் நடைபெற்ற நிலையில் பிரதமர் வேட்பாளராக காங்கிரஸ் தலைவர் மல்லிகார்ஜூன கார்கேவை நியமிக்கக் கோரி திரிணாமுல் காங்கிரஸ் தலைவர் மம்தா மற்றும் டெல்லி முதலமைச்சர் அரவிந்த் கெஜ்ரிவால் வலியுறுத்தியதாக தெரிவிக்கப்பட்டு உள்ளது.

டெல்லி :எதிர்க்கட்சிகளின் இந்தியா கூட்டணியின் 4வது கட்ட ஆலோசனைக் கூட்டம் தலைநகர் டெல்லியில் நடைபெற்றது. இதில் தமிழ்நாடு முதலமைச்சரும், திமுக தலைவருமான மு.க ஸ்டாலின், திரிணாமுல் காங்கிரஸ் தலைவர் ம்மதா பானர்ஜி, பீகார் முதலமைச்சர் நிதிஷ் குமார், காங்கிரஸ் தலைவர்கள் சோனியா காந்தி, ராகுல் காந்தி, மல்லிகார்ஜூன கார்கே உள்ளிட்டோர் கலந்து கொண்டு ஆலோசனை நடத்தினர்.

கூட்டத்தில் அடுத்த ஆண்டு நடைபெற உள்ள நாடாளுமன்ற தேர்தலில் பங்கேற்பது, தொகுதி பங்கீடு குறித்து ஆலோசனை மேற்கொள்ளப்பட்டதாக தெரிவிக்கப்பட்டு உள்ளது. மேலும், இந்திய கூட்டணியின் பிரதமர் வேட்பாளராக மல்லிகார்ஜூன கார்கேவை தேர்ந்தெடுக்க மேற்கு வங்க முதலமைச்சர் மம்தா பானர்ஜி மற்றும் டெல்லி முதலமைச்சர் அரவிந்த் கெஜ்ரிவால் முன்மொழிந்ததாக தெரிவிக்கப்பட்டு உள்ளது.

இருப்பினும் இதை ஏற்க மறுத்த மல்லிகார்ஜூன கார்கே தேர்தலில் வெற்றி பெறுவது முதல் பணியாக இருக்க வேண்டும் என்றும் அதன்பின் தலைமை குறித்து அலோசிக்கலாம் என்றும் தெரிவித்ததாக கூறப்பட்டு உள்ளது. இருப்பினும் இந்த விவகாரத்தில் இறுதி முடிவு கிட்டவில்லை எனத் தெரிவிக்கப்பட்டு உள்ளது.

முன்னதாக இந்தியா கூட்டணியின் ஆலோசனைக் கூட்டத்தில் கலந்து கொள்ள டெல்லி வந்த மேற்கு வங்க முதலமைச்சர் மம்தா பானர்ஜி, செய்தியாளர்கள் சந்திப்பின் போது, பிரதமர் வேட்பாளர் குறித்து தேர்தலுக்கு பின்னர் கலந்து ஆலோசித்து முடிவு எடுக்கப்படும் என்று தெரிவித்து இருந்தார்.

கூட்டத்தை தொடந்து செய்தியாளர்களை சந்தித்த காங்கிரஸ் தலைவர் மல்லிகார்ஜூன கார்கே, இந்தியா கூட்டணி கட்சிகள் தொகுதி பங்கீடு விவகாரத்தில் மாநில அளவிலான பேச்சுவார்த்தை நடத்த திட்டமிட்டு உள்ளதாகவும் நாடு முழுவதும் பல்வேறு இடங்களில் பொது கூட்டங்கள் நடத்த உள்ளதாகவும் கூறினார்.

மேலும், பிரதமர் வேட்பாளர் தேர்வு என்பது தேர்தலுக்கு பின்னர் அனைத்து கட்சி உறுப்பினர்களின் ஒருமித்த கருத்துடன் ஜனநாயக முறைப்படி தேர்வு செய்யப்படும் என்று மல்லிகார்ஜூன கார்கே தெரிவித்தார். கூட்டணியில் முன்னிலைப்படுத்துவது குறித்து அனைத்து கட்சிகளும் ஒருசேர முடிவு எடுத்து உள்ளதாகவும், நாடு முழுவதும் குறைந்தது 8 முதல் 10 கூட்டங்கள் வரை நடத்த திட்டமிட்டு உள்ளதாகவும் கார்கே தெரிவித்தார்.

மேலும் தமிழ்நாடு, கேரளா, தெலங்கானா, பீகார், உத்தர பிரதேசம், டெல்லி அல்லது பஞ்சாப் மாநிலங்களிடையே ஏற்பட்ட தொகுதி பங்கீடு விவகாரம் சுமூக தீர்க்கப்பட்டதாக தெரிவித்தார். மக்களவை மற்றும் மாநிலங்களவையில் எதிர்க்கட்சி எம்.பிக்கள் இடைநீக்கம் செய்யப்பட்டதை கண்டித்து வரும் டிசம்பர் 22ஆம் தேதி போராட்டம் நடத்துவது குறித்து அனைத்து எதிர்க்கட்சிகளும் தீர்மானம் நிறைவேற்றி உள்ளதாக குறிப்பிட்டார்.

இதையும் படிங்க :வெள்ளத்தால் பாதிக்கப்பட்ட மக்களுக்கு நிவாரணப் பொருட்களை வழங்க சிறப்பு குழு ஏற்பாடு!