நாடாளுமன்ற சிறப்பு கூட்டத்தொடரில் தாக்கல் செய்யப்படுகிறதா ‘பாரத்’ மசோதா?

Special Parliament session by renaming "India" to "Bharat": நடைபெற உள்ள நாடாளுமன்ற சிறப்பு கூட்டத்தொடரில் ‘இந்தியா’ என்பதற்குப் பதிலாக ‘பாரத்’ என்ற பெயரை மாற்றம் செய்யும் மசோதா தாக்கல் செய்ய உள்ளதாக தகவல் வெளியாகி உள்ளது.

ஹைதராபாத்: டெல்லியில் நடைபெற உள்ள ஜி20 மாநாட்டின் விருந்தினர்களை அழைப்பதற்கான குடியரசுத் தலைவரின் அதிகாரப்பூர்வ நாளிதழலில் ‘பாரதத்தின் குடியரசுத் தலைவர்’ (The President of Bharat) என குறிப்பிடப்பட்டு உள்ளது. இது ‘இந்தியா’ (India) என்பதை ’பாரத்’ (Bharat) என மாற்றுவதற்கான ஆயத்தப் புள்ளி எனவும், எதிர்கட்சிகளின் INDIA கூட்டணியின் பெயரை மத்திய பாஜக அரசு பயன்படுத்த விரும்பாத காரணம் என்றும் பல்வேறு குற்றச்சாட்டுகளும், ஆதரவும் பெற்று வருகிறது.

இந்த நிலையில், வருகிற செப்டம்பர் 18 முதல் செப்டம்பர் 22 வரை புதிதாக திறக்கப்பட்டு உள்ள நாடாளுமன்ற வளாகத்தில் நாடாளுமன்ற சிறப்பு கூட்டத்தொடர் நடைபெற உள்ளதாக அறிவிக்கபட்டது. எனவே, இந்த சிறப்பு கூட்டத்தொடரில் ‘இந்தியா’ என்ற பெயரை ‘பாரத்’ என மாற்றம் செய்வதற்கான புதிய மசோதாவை மத்திய பாஜக அரசு தாக்கல் செய்ய உள்ளதாக மத்திய அரசு வட்டாரங்கள் ஈடிவி பாரத் செய்திகளுக்கு தகவல் அளித்து உள்ளன.

முன்னதாக, இது தொடர்பாக காங்கிரஸ் மூத்த தலைவர் ஜெய்ராம் ரமேஷ் வெளியிட்டு உள்ள ‘X' வலைதளப் பதிவில், “குடியரசுத் தலைவர் மாளிகையில் இருந்து செப்டம்பர் 9 அன்று நடைபெற உள்ள ஜி20 விருந்திற்காக அனுப்பப்பட்ட அழைப்பிதழில் இந்தியாவின் குடியரசுத் தலைவர் என்பதற்குப் பதிலாக பாரத்தின் குடியரசுத் தலைவர் என குறிப்பிடப்பட்டு இருக்கிறது. எனவே, இந்த செய்தி உண்மைதான்.

இப்போது அரசியலமைப்புச் சட்டத்தின் பிரிவு 1-ஐப் படிக்கலாம். அதில், ‘பாரத், அது இந்தியா. மாநிலங்களின் ஒருங்கிணைப்பு. ஆனால், தற்போது மாநிலங்களின் ஒருங்கிணைப்பு தாக்குதலுக்கு உள்ளாக்கப்பட்டு உள்ளது" என தெரிவித்து உள்ளார். அதிலும், அசாம் மாநில முதலமைச்சர் ஹிமாந்தா பிஸ்வா சர்மா உள்ளிட்டோர் தங்களது ‘X' வலைதளப் பக்கத்தில் Chief Minister of Assam, Bharat என மாற்றம் செய்து உள்ளனர்.

மேலும், சிலர் எதிர்கட்சிகளின் ‘INDIA' என்ற கூட்டணி பெயரைப் பயன்படுத்துவதற்கும், தேர்தலில் வெற்றி பெறுவதற்கும், இந்தியா என்ற பெயரை பாரத் என மாற்றுவது போன்ற தரம் தாழ்ந்த அரசியலை மத்திய அரசு கையில் எடுத்து உள்ளதா? என நெட்டிசன்கள் சமூக வலைதளப் பக்கங்களில் கேள்வி எழுப்பி வருகின்றனர்.

இதையும் படிங்க:"பாரத் குடியரசுத் தலைவர் - மாநிலங்களின் ஒன்றியத்திற்கு ஏற்பட்டுள்ள அச்சுறுத்தல்" - காங்கிரஸ் கண்டனம்!