ராஜஸ்தானில் முன்னாள் காங்கிரஸ் தலைவரின் மகள் கடத்தல்!

ராஜஸ்தானில் முன்னாள் காங்கிரஸ் தலைவரும், முன்னாள் அமைச்சருமான கோபால் கேஷாவத்தின் மகள் அடையாளம் தெரியாத நபர்களால் கடத்தப்பட்டார்.

ராஜஸ்தான்: முன்னாள் காங்கிரஸ் தலைவரின் 21 வயது மகள் நேற்று (நவ.21) காய்கறி வாங்கச் சென்றிருந்தபோது அடையாளம் தெரியாத நபர்களால் கடத்தப்பட்டதாக போலீஸார் தெரிவித்தனர்.

காங்கிரஸ் தலைவர் கோபால் கேஷாவத், மகள் அபிலாஷா தனது ஸ்கூட்டரில் காய்கறிகள் வாங்க சென்றுள்ளார். சிறிது நேரம் கழித்து, தனது தந்தையை போனில் அழைத்து, அடையாளம் தெரியாத நபர்கள் தன்னை துரத்துகிறார்கள் என்று கூறியுள்ளார்.

இந்நிலையில், காணாமல் போன மகள் குறித்து கோபால் கேஷாவத் பிரதாப் நகர் காவல் நிலையத்தில் புகார் அளித்துள்ளார். இதுகுறித்து விசாரணை நடத்திய காவல்துறை அதிகாரி பஜன் லால், அந்தப் பெண்ணின் போன் சுவிட்ச் ஆஃப் செய்யப்பட்டுள்ளது; இன்று காலை விமான நிலைய சாலையில் பெண்ணின் ஸ்கூட்டர் கண்டெடுக்கப்பட்டது என்று கூறினார்.

இச்சம்பவம் தொடர்பாக அப்பகுதியில் உள்ள காய்கறி வியாபாரிகளிடம் விசாரணை நடத்தியதாகவும், ஆனால் அவர்களில் யாருக்கும் இது குறித்து எந்த விவரமும் தெரியவில்லை என்றும் பஜன் லால் கூறினார்.

இந்நிலையில் கேஷாவத் சில சந்தேக நபர்களின் பெயர்களை காவல்துறையிடம் கொடுத்துள்ளதாகவும், அவர்கள் மீது நடவடிக்கை எடுக்க வேண்டும் எனவும் கூறினார்.

இதையும் படிங்க: மாணவிகளின் கழிப்பறைக்குள் வீடியோ எடுத்த மாணவர் கைது