கோவிட் -19 பரவலைக் கட்டுப்படுத்த உத்தவ் தாக்கரே அரசு தவறிவிட்டது - ஃபட்னாவிஸ் குற்றச்சாட்டு

மும்பை: முதலமைச்சர் உத்தவ் தாக்கரே தலைமையிலான அரசு, மகாராஷ்டிராவில் கோவிட் -19 தொற்றுநோயின் பரவலைக் கட்டுப்படுத்த தவறிவிட்டதாக அம்மாநில பாஜக தலைவரும், சட்டப்பேரவை எதிர்க்கட்சித் தலைவருமான தேவேந்திர ஃபட்னாவிஸ் குற்றஞ்சாட்டியுள்ளார்.

மகாராஷ்டிரா மாநிலத்தைச் சேர்ந்த சிவசேனா கட்சியின் தலைமையிலான மகா விகாஸ் அகாடி கூட்டணி ஆட்சி செய்துவருகிறது. கடும் அரசியல் நெருக்கடியைக் கடந்து சிவசேனா, தேசியவாத காங்கிரஸ், காங்கிரஸ் ஆகிய மூன்று கட்சிகளின் ஒருங்கிணைப்பில் மகா விகாஸ் அகாடி கூட்டணி அரசு நடைபெற்றுவருகிறது. இந்தக் கூட்டணி அரசு தன்னுடைய முதலாம் ஆண்டை இன்று (நவ. 28) நிறைவுசெய்கிறது.

இது தொடர்பாக இன்று ஊடகங்களைச் சந்தித்துப் பேசிய தேவேந்திர ஃபட்னாவிஸ், “கோவிட்-19 பெருந்தொற்றுநோயைக் கையாளுவதில் இந்த மகா விகாஸ் அகாடி கூட்டணி அரசு தோல்வியை அடைந்துள்ளது. நல்ல வேளையாக, கரோனா வைரஸ் பரவலின் இரண்டாவது அலையால் மகாராஷ்டிரா பாதிக்கப்படவில்லை.

ஆளும் கூட்டணியின் தலைவர்கள் வெட்கமின்றி அப்பாவி மக்களிடம் தாங்கள் கரோனாவைக் கட்டுப்படுத்தியதாகக் கூறுகின்றனர். கோவிட்-19 காரணமாக நாட்டில் நடந்த இறப்புகளில், 47 ஆயிரம் பேர் மகாராஷ்டிராவில் மட்டுமே நிகழ்ந்துள்ளது. கோவிட்-19 பரவலை, அதன் பாதிப்பைக் கட்டுப்படுத்துவதற்குப் பதிலாக அவர்கள் தரவுகளை மறைக்கப் போராடுகிறார்கள்.

மாநிலத்தில் கோவிட்-19 தடுப்பு முன்னெச்சரிக்கை நடவடிக்கையாக மேற்கொள்ளப்பட்ட மருத்துவக் கருவிகள் கொள்முதலில் தாக்கரே அரசு மிகப்பெரும் ஊழலை புரிந்துள்ளது. அவை அனைத்தையும் நாங்கள் விரைவில் அம்பலப்படுத்துவோம். தொற்றுநோய் தீவிரமடைந்தபோது, இது குறித்து முதலமைச்சருக்கு நான் பல கடிதங்களை எழுதி அனுப்பியிருந்தேன். அவர் எதற்கும் பதிலளிக்கவில்லை. எனது பரிந்துரைகளுக்கு அவர் செவிசாய்க்கவில்லை.

நடிகை கங்கனா, பத்திரிகையாளர் அர்னாப் கோஸ்வாமி மீதான வழக்குகள் அரச இயந்திரங்களை அவர்கள் தவறாகப் பயன்படுத்தியதை உலகிற்கு எடுத்துச்சொல்லும் சிறந்த எடுத்துக்காட்டுகள். இந்த இரண்டு வழக்குகள் மட்டுமல்லாமல், பல தகவல் அறியும் ஆர்வலர்கள் சிவசேனா அரசிற்கு எதிராகப் பேசக்கூடாது என அச்சுறுத்தப்பட்டுள்ளனர்.

தாக்கரே மற்றவர்களை அச்சுறுத்திவருகிறார். உங்களது கூட்டணி அரசை ஐந்து ஆண்டுகள் நீங்கள் நடத்த வேண்டும். மக்களையும், கேள்விக்கேட்கும் மற்றவர்களையும் அச்சுறுத்த வேண்டாம். இப்படியாக அச்சுறுத்துவது முதலமைச்சருக்கு அழகல்ல.

நீங்கள் பிரதமர் நரேந்திர மோடியின் பெயரைச் சொல்லித்தான் வாக்குகளைப் பெற்றீர்கள். பின்னர் அவரது எதிரிகளுடன் கைக்கோத்து துரோகம் செய்து இந்த அரசை அமைத்தீர்கள்” எனக் கூறினார்.

இதையும் படிங்க :காங். தலைவர்கள் மீதான மதுபான பார் மோசடி வழக்கை மீண்டும் கையிலெடுக்கும் கேரள அரசு!