'அவசர அவசரமாக பள்ளிகளைத் திறக்க வேண்டாம்' - எய்ம்ஸ் பேராசிரியர்

கரோனா முழுமையாக குறையாத சூழ்நிலையில், பள்ளிகளைத் திறப்பதில் அரசு நிதானம் காட்ட வேண்டும் என டெல்லி எய்ம்ஸ் மருத்துவமனை பேராசிரியர் நவீத் விக் கேட்டுக்கொண்டுள்ளார்

2020ஆம் ஆண்டு மார்ச் மாதம் நாட்டில் கரோனா வைரஸ் பரவியதைத் தொடர்ந்து, கடந்த இரண்டு ஆண்டுகளாக நாடு முழுவதும் பள்ளிகள் மூடப்பட்டுள்ளன. மாணவர்கள் அனைவரும் வீட்டிலிருந்தபடியே ஆன்லைனில் கல்வி பயின்று வருகின்றனர்.

தற்போது, கரோனா தொற்றின் இரண்டாம் அலை படிப்படியாக குறைந்து வரும் சூழ்நிலையில், பல்வேறு மாநிலங்களிலும் பள்ளிகள் திறக்கப்பட்டு வருகின்றன.

வரும் செப்டம்பர் ஒன்றாம் தேதி முதல் தமிழ்நாடு, டெல்லி, தெலங்கானா உள்ளிட்ட பல மாநிலங்களில் பள்ளிகள் வகுப்பு வாரியாக பிரித்து நடத்தப்படவுள்ளன.

குழந்தைகளுக்கு தடுப்பூசி செலுத்தும் பணிகள் தொடங்கப்படாத நிலையில், பள்ளிகள் அவசரமாக அவசரமாக திறக்கப்படுவதற்கு மருத்துவ நிபுணர்கள், சமூக ஆர்வலர்கள் என பலரும் கண்டனம் தெரிவித்து வருகின்றனர்.

பள்ளியில் கரோனா பரவும் வாய்ப்பு அதிகம்

இந்நிலையில்இது தொடர்பாக ஏஎன்ஐ செய்தி நிறுவனத்திற்கு பேட்டியளித்த டெல்லி எய்ம்ஸ் மருத்துவமனை பேராசிரியர் நவீத் விக், "குழந்தைகளுக்கு வீட்டில் உள்ள கற்கும் சூழல் குறித்து பேசும் நாம், நம் அபாயங்களையும் பார்க்க வேண்டும். நன்மை தீமைகளை நாம் ஒப்பிட்டுப் பார்க்க வேண்டும்.

டெல்லி எய்ம்ஸ் மருத்துவமனை பேராசிரியர் நவீத் விக்

மாணவர்கள் அறைக்குள் இருக்கும் சூழலில் தொற்று பரவும் வாய்ப்பு அதிகம் உள்ளது. அடுத்த இரண்டு மாதங்களில் பண்டிகைக்காலம் வருவதையும் கருத்தில் கொள்ள வேண்டும்.

குழந்தைகளுக்கு தடுப்பூசி செலுத்தப்படாததால், போக்குவரத்து, தனிமைப்படுத்தல் தகுந்த இடைவெளியை உறுதி செய்தல் போன்ற பல சிக்கல்கள் இங்கே உள்ளன.

பள்ளிகளைத் திறப்பதில் நிதானம் வேண்டும்

கரோனா இன்னும் முழுமையாக முடிவுக்கு வராத சூழலில் பள்ளிகளைத் திறப்பதில் நிதானம் காட்டுமாறு மத்திய, மாநில அரசுகளை கேட்டுக்கொள்கிறேன்.

அனைவரும் தடுப்பூசி செலுத்தினால் மட்டுமே, கரோனா இல்லாத நாட்டை நம்மால் உருவாக்கிட முடியும்" எனத் தெரிவித்துள்ளார்.

இதையும் படிங்க:இந்தியாவில் மேலும் 45,083 பேருக்கு கரோனா