அயோத்தி ராமர் கோயில் கும்பாபிஷேகத்தில் கலந்து கொள்கிறாரா சோனியா காந்தி?

Sonia Gandhi 'yet to take a decision' on attending Ram Lalla consecration: அயோத்தியில் புதிதாக கட்டப்பட்டுள்ள ராமர் கோயில் கும்பாபிஷேகத்தில் சோனியா காந்தி மற்றும் மல்லிகார்ஜுன கார்கே ஆகியோர் கலந்து கொள்வார்களா என்று எதிர்பார்க்கப்படுகிறது.

டெல்லி:உத்தரப் பிரதேசம் மாநிலம், அயோத்தியில் புதிதாக கட்டப்பட்டுள்ள ராமர் கோயில் கும்பாபிஷேகம், வருகிற 2024 ஜனவரி 22 அன்று நடைபெற உள்ளது. இந்த நிகழ்வில் பிரதமர் நரேந்திர மோடி கலந்து கொள்கிறார். இதற்காக இந்தியா மட்டுமல்லாமல், உலகம் முழுவதும் உள்ள பல தலைவர்களுக்கு அழைப்பு விடுக்கப்பட்டுள்ளது.

மேலும், ராமர் கோயில் கும்பாபிஷேகத்திற்கு ஸ்ரீ ராம் ஜென்மபூமி தீர்த்த க்ஷேத்ரா அறக்கட்டளையின் முக்கிய நபர்கள் சோனியா காந்தி மற்றும் காங்கிரஸ் தேசியத் தலைவர் மல்லிகார்ஜுன கார்கே ஆகிய இருவருக்கும் நேரில் சென்று, ராமர் கோயில் நிகழ்ச்சியில் கலந்து கொள்ள அழைப்பு விடுத்துள்ளனர்.

கடந்த சில தினங்களாக காங்கிரஸ் முன்னாள் தலைவர் சோனியா காந்தி ராமர் கோயில் நிகழ்ச்சியில் கலந்து கொள்வார் என்றும், மேலும் சில தகவல்கள் அவர் சார்பாக பிரதிநிதியை அனுப்புவார் என தெரிவிக்கப்பட்டு வந்தது. ராமர் கோயில் திறப்பிற்குப் பின், சில மாதங்களில் நாடாளுமன்றத் தேர்தல் வர உள்ளதால், இந்தியாவில் உள்ள எதிர்கட்சிகள் ராமர் கோயில் திறப்பில் கலந்து கொள்வது குறித்தான அனைவரின் எதிர்பார்ப்பும் அதிகமாகியுள்ளது.

இந்த நிலையில், தற்போது வரை காங்கிரஸ் தரப்பில் சோனியா காந்தி மற்றும் காங்கிரஸின் தற்போதைய தேசியத் தலைவர் மல்லிகார்ஜுன கார்கே கலந்து கொள்வது குறித்து இதுவரை எந்த இறுதி முடிவும் எடுக்கப்படவில்லை என தெரிவிக்கப்பட்டுள்ளது.

இது தொடர்பாக, காங்கிரஸ் பொதுச் செயலாளர் ஜெய்ராம் ரமேஷ் கூறும்போது, "ராமர் கோயில் நிகழ்ச்சியில் சோனியா காந்தி மற்றும் காங்கிரஸ் தேசியத் தலைவர் மல்லிகார்ஜுன கார்கே ஆகியோர் கலந்து கொள்வது குறித்து கட்சி முடிவு எடுக்கும். மேலும் இருவருக்கும் ராமர் கோயில் நிகழ்ச்சியில் கலந்து கொள்ள நேரில் அழைப்பு விடுக்கப்பட்டது” என தெரிவித்துள்ளார்.

இதையும் படிங்க:மங்களூர் விமான நிலையத்திற்கு வெடிகுண்டு மிரட்டல்!