10 ஆண்டுகளுக்குப் பின்னர் புதுச்சேரியில் முழுமையான பட்ஜெட்!

'புதுச்சேரியில் 15ஆவது சட்டப்பேரவையின் 3ஆம் கூட்டத்தொடர் ஆகஸ்ட் 10ஆம் தேதி துணைநிலை ஆளுநர் உரையுடன் தொடங்க உள்ளது; தொடர்ந்து முதலமைச்சர் ரங்கசாமி பட்ஜெட்டை தாக்கல் செய்வார்' என சபாநாயகர் செல்வம் கூறியுள்ளார்.

புதுச்சேரிசட்டப்பேரவையில் ஆண்டுதோறும் மார்ச் மாதம் பட்ஜெட் தாக்கல் செய்யப்படும். கடந்த 10ஆண்டுகளுக்கும் மேலாக முழுமையான பட்ஜெட் தாக்கல் செய்யப்படுவதில்லை.

மார்ச் மாதம் இடைக்கால பட்ஜெட்டும், ஆகஸ்ட், செப்டம்பரில் முழு பட்ஜெட்டும் தாக்கல் செய்யப்பட்டு வருகிறது. நடப்பு நிதியாண்டிலும் மார்ச் மாதம் பட்ஜெட் தாக்கல் செய்யப்படவில்லை. மார்ச் மாதம் 5 மாதச்செலவினங்களுக்கு இடைக்கால பட்ஜெட் தாக்கல் செய்யப்பட்டது. முழுமையான பட்ஜெட்டை தாக்கல் செய்வதற்கான பட்ஜெட் கூட்டத்தொடர் அடுத்தமாதம் ஆகஸ்ட் 10ஆம் தேதி கூடுகிறது.

அன்றைய தினம் புதுச்சேரி துணைநிலை ஆளுநர் தமிழிசை உரையாற்றி கூட்டத்தொடரை தொடங்கி வைக்கிறார். தொடர்ந்து மறுநாள் நிதிப்பொறுப்பு வகிக்கும் முதலமைச்சர் ரங்கசாமி பட்ஜெட்டை தாக்கல் செய்வார் எனத்தெரிகிறது. கூட்டத்தொடர் குறைந்தபட்சம் 15 நாட்கள் நடைபெறும் எனவும் கூறப்படுகிறது.

இதுகுறித்து சபாநாயகர் செல்வம் கூறியதாவது, 'புதுச்சேரியின் 15ஆவது சட்டப்பேரவையின் பட்ஜெட் கூட்டத்தொடர் ஆளுநர் உரையுடன் வரும் ஆகஸ்ட் 10ஆம் தேதி காலை 9.30 மணிக்குத் தொடங்குகிறது. அலுவல் ஆய்வுக்குழு கூடி சட்டசபை அலுவல் நாட்களை முடிவு செய்யும். முழு பட்ஜெட்டை முதலமைச்சர் ரங்கசாமி தாக்கல் செய்வார். காகிதமில்லாத பட்ஜெட்டை தாக்கல் செய்ய தகவல் தொழில்நுட்பத்துறையுடன் பேசி வருகிறோம்.

2012-க்குப் பிறகு புதுச்சேரி கணக்கை முழுமையாக அலுவலர்கள் தாக்கல் செய்யவில்லை. இதற்காக தனி தணிக்கைக் குழு அமைக்கப்பட்டுள்ளது. பல்கலைக்கழக அரங்கில் நாளை புதன்கிழமை தணிக்கைக்குழுவின் கூட்டம் நடக்கிறது. இதில் புதுச்சேரி துணைநிலை ஆளுநர் தமிழிசை தலைமையில் 600 அலுவலர்கள் பங்கேற்கின்றனர். நானும், பொதுக்கணக்கு குழுத்தலைவர் கே.எஸ்.பி.ரமேஷும் பங்கேற்கிறோம். இந்த பட்ஜெட்டில் செலவினங்களை சமர்ப்பித்த பிறகுதான் அடுத்த பட்ஜெட்டில், துறைகளுக்கு நிதி ஒதுக்க முதலமைச்சர் உத்தரவிட்டுள்ளார்.

கணக்குகளை முழுமையாக ஒப்படைக்கும்போது மத்திய அரசிடம் இருந்து கூடுதலாக நிதி கிடைக்கும். ஒத்துழைப்பு அளிக்காத அலுவலர்களை இடமாற்றம் செய்துவருகிறோம். 25 விழுக்காடு அலுவலர்கள் ஒத்துழைப்புத்தருவதில்லை. சட்டப்பேரவையில் பதாகைகள், பேனர் பிடிக்க தடை விதிக்கப்படுகிறது.

புதிய சட்டப்பேரவை கட்டட கட்டுமான ஒப்பந்தத்தை டெல்லியைச் சேர்ந்த நிறுவனத்திடம் ஒப்படைக்க உள்ளோம். விரைவில் பூமி பூஜை நடத்தப்படும்’ என்றார்.

இதையும் படிங்க:கார்கில் வெற்றி தினம் - நாடு முழுவதும் கொண்டாட்டம்!