சிவசேனா நிறுவனத் தலைவர் பால சாகேப் தாக்கரே (பால் தாக்கரே) ஜனநாயகம் மீது பெரும்பாலும் நம்பிக்கையற்றவர். அவரின் பேச்சில்கூட அதனை அடிக்கடி காணலாம். வெவ்வேறு சம்பவங்களில் அண்ணல் காந்தியடிகள், ஜவஹர்லால் நேரு குறித்து இகழ்ந்துள்ளார்.
தீவிர இந்துத்துவாவை கையிலெடுத்த பால் தாக்கரே
சிவசேனாவின் முழக்கம், 'மராட்டியம் மராத்தியர்களுக்கே' என்பதாகும். இந்தப் பயணத்தில் அதிதீவிரமாக செயல்பட்ட பால் தாக்கரே, 1980 காலகட்டங்களில் தீவிர இந்துத்துவாவை கையிலெடுத்தார்.
கொள்கையின் பால் ஈர்ப்பால் பால் தாக்கரேவும் பா.ஜனதாவும் இணைந்து செயல்பட ஆரம்பித்தன. தேசியவாத காங்கிரசும் காங்கிரசும் சிவசேனாவுக்கு எதிர் வரிசையில் கைகோர்த்தன. காங்கிரஸ் தலைவர்கள் பலர் மீது தாக்கரே கடுஞ்சொற்களை வீசினார்.
சோனியா காந்தியை இத்தாலி நாட்டைச் சேர்ந்த வெளிநாட்டு பெண்மணி என்றும் அவர் அடிக்கடி உச்சரிப்பதுண்டு. சோனியா காந்தியின் பிரதமர் ஆசைக்கு கடும் எதிர்ப்புக் கொடி காட்டியவர்களில் பிரதானமானவர் பால்தாக்கரேதான்.
இதையும் படிங்க: சிவாஜி பூங்காவில் பதவியேற்பார் ஆதித்யா தாக்கரே...! - நம்பிக்கையில் சிவசேனா
வசந்த சேனாவாக உருவான சிவசேனா
சிவசேனாவின் மராத்தி மராத்தியர்களுக்கே என்ற முழக்கம் மற்ற மாநில மக்களை பாதித்தது. குறிப்பாக வட மற்றும் தென்னிந்திய மக்கள் பெரிதும் பாதிக்கப்பட்டனர். முஸ்லிம்களுக்கு எதிரான அரசியல், 1993ஆம் ஆண்டு கலவரம் உள்ளிட்ட சம்பவங்கள் சிவசேனாவையும் காங்கிரஸையும் எதிரெதிர் துருவங்கள் ஆக்கின.
ஆனாலும் சில முரண்பாடான சம்பவங்களும் அறங்கேறின. பால் தாக்கரே அனைத்து கட்சித் தலைவர்களுடன் நல்லுறவை கொண்டிருந்தார். அதில் சில காங்கிரஸ் தலைவர்களும் அடக்கம். 1966ஆம் ஆண்டு சிவசேனா உருவானபோது, அதனை 'வசந்த சேனா' என்றார்கள்.
தேர்தல்களில் எதிரொலித்த சிவசேனாவின் வளர்ச்சி
அப்போதைய காங்கிரஸ் முதலமைச்சர் வசந்தராவ் நாயக்கிடம் அவர்கள் கொண்டிருந்த நல்லுறவின் அடிப்படையில் இவ்வாறு அக்கட்சி அழைக்கப்பட்டது. 1980ஆம் ஆண்டுகளுக்கு பிறகு சிவசேனாவின் வளர்ச்சி அபரிமிதமானது. அது 1989ஆம் ஆண்டு தேர்தல்களிலும் எதிரொலித்தது.
2000ஆவது ஆண்டுகளில் சரத் பவார் (தேசியவாத காங்கிரஸ்), விலாஸ்ராவ் தேஷ்முக் (காங்கிரஸ்), சுஷில்குமார் ஷிண்டே (பாஜக) உள்ளிட்ட தலைவர்களுடன் விருந்தோம்பலைத் தொடர்ந்தார்.