கரோனா காரணமாக வெளிநாடுகளில் சிக்கியிருக்கும் இந்தியர்களை தாயகம் அழைத்துவர 'வந்தே பாரத் மிஷன்' திட்டத்தின் கீழ் சிறப்பு விமானங்கள் இயக்கப்பட்டு வருகின்றன. அதன்படி, துபாயிலிருந்து கேரள மாநிலம், கரிப்பூர் விமான நிலையத்திற்கு வந்த ’ஏர் இந்தியா எக்ஸ்பிரஸ்’ விமானம் நேற்று (ஆகஸ்ட் 7) இரவு விபத்துக்குள்ளானது. கேரள மாநிலத்தில் கனமழை பெய்து வரும் நிலையில், தரையிறங்கும்போது ஓடுபாதையில் வழுக்கியதால் இந்த விமானம் விபத்துக்குள்ளாகியுள்ளது.
இவ்விபத்து நாடு முழுவதும் அதிர்வலைகளை ஏற்படுத்தியுள்ள நிலையில், குடியரசுத் தலைவர் ராம்நாத் கோவிந்த், பிரதமர் மோடி, ராகுல் காந்தி, பிரியங்கா காந்தி என பல தலைவர்கள் இரங்கல் தெரிவித்து வருகின்றனர்.
பிரதமர் மோடி வெளியிட்ட இரங்கல் செய்தியில், "கோழிக்கோட்டில் நடைபெற்ற விமான விபத்தால் மிகுந்த வேதனை அடைந்துள்ளேன். பலரின் அன்புக்குரியவர்கள் விபத்தில் உயிரிழந்துள்ளார்கள். அவர்களுக்கு தோளோடு தோள் கொடுப்பேன். படுகாயம் அடைந்தவர்கள் விரைவில் குணமடைய வாழ்த்துகிறேன். நிலைமை குறித்து கேரள முதலமைச்சர் பினராயி விஜயனிடம் கேட்டறிந்தேன். பாதிக்கப்பட்டவர்களுக்கு அனைத்து விதமான உதவிகளையும் சம்பந்தப்பட்ட அரசு அமைப்புகள் செய்து வருகின்றன" எனத் தெரிவிக்கப்பட்டுள்ளது.