இந்தியாவில் சிக்கியுள்ள வெளிநாட்டவருக்கு உதவ புதிய இணையதளம்!

டெல்லி: கோவிட்-19 வைரஸ் தொற்றால் இந்தியாவின் பல்வேறு பகுதிகளில் சிக்கித் தவிக்கும் வெளிநாட்டவர்களுக்கு உதவ புதிய இணையதளம் உருவாக்கப்பட்டுள்ளது.

உலகெங்கும் கோவிட்-19 வைரஸ் தொற்றால் பாதிக்கப்பட்டவர்களின் எண்ணிக்கை நாள்தோறும் உயர்ந்துவருகிறது. இதுவரை 8 லட்சத்திற்கும் அதிகமானோருக்கு வைரஸ் தொற்று இருப்பது உறுதி செய்யப்பட்டுள்ளது.

இந்தியாவிலும் இந்த வைரஸ் தொற்றால் 1,200க்கும் மேற்பட்டோர் பாதிக்கப்பட்டுள்ளனர். வைரஸ் பரவலைக் கட்டுப்படுத்த நாடு முழுவதும் ஊரடங்கு உத்தரவு பிறப்பிக்கப்பட்டுள்ளது. மேலும், அனைத்து உள்நாட்டு மற்றும் வெளிநாட்டு விமானச் சேவைகளும் ஏப்ரல் 14ஆம் தேதி வரை ரத்து செய்யப்பட்டுள்ளன.

இதனால் வெளிநாட்டிலிருந்து இந்தியா வந்திருந்த சுற்றுலாப் பயணிகள் பெரிதும் பாதிக்கப்பட்டுள்ளனர். ஊரடங்கு உத்தரவால் சுற்றுலாப் பயணிகள் பல்வேறு மாநிலங்களில் சிக்கியுள்ளனர்.

இந்நிலையில், அவர்களுக்கு உதவும் வகையில் புதிய இணையதளம் உருவாக்கப்படுள்ளதாக சுற்றுலாத் துறை அமைச்சகம் அறிவித்துள்ளது. strandedinindia.com என்ற இந்த தளத்தில், வெளிநாட்டினர் உதவிக்கு யாரை தொடர்புகொள்ளலாம் என்பது குறித்த தகவல்கள் வழங்கப்பட்டுள்ளன. மேலும், மாநில வாரியான உதவி எண்கள் குறித்த தகவல்களும் உதவி மையங்கள் குறித்த தகவல்களும் இதில் வழங்கப்பட்டுள்ளன.

இதுமட்டுமின்றி வெளிநாட்டு பயணிகள் சம்பந்தப்பட்ட அலுவலர்களைத் தொடர்பு கொள்ள தேவையான தகவல்களும் இந்தத் தளத்தில் வழங்கப்பட்டுள்ளன.

இதையும் படிங்க: கரோனா - ஸ்பைஸ்ஜெட் பணியார்களுக்கு சம்பளம் கட்!