கரோனா தடுப்புமருந்து சோதனையில் கலந்துகொள்ள இந்த எண்ணை தொடர்பு கொள்ளுகள்!

புனே: இந்தியாவில் மீண்டும் தொடங்கப்படவுள்ள ஆக்ஸ்போர்ட் பல்கலைக்கழகத்தின் கரோனா தடுப்பு மருந்து சோதனையில் தன்னார்வலர்களாக கலந்து கொள்ள தொடர்பு கொள்ள வேண்டிய எண்ணகளை சீரம் நிறுவனம் அறிவித்துள்ளது.

கரோனா தொற்றுக்கு தடுப்புமருந்தைக் கண்டுபிடிக்க உலகின் பல்வேறு ஆராய்ச்சியாளர்களும் தொடர்ந்து முயன்று வருகின்றனர். குறிப்பாக பிரிட்டனின் ஆக்ஸ்போர்ட் பல்கலைக்கழகமும் அஸ்ட்ராஜெனெகா (AstraZeneca) என்ற மருத்து நிறுவனமும் இணைந்து உருவாக்கியுள்ள கரோனா தடுப்பு மருத்திற்கு உலகெங்கும் எதிர்பார்ப்பு உள்ளது.

இந்தத் தடுப்பு மருந்தின் மூன்றாம்கட்ட மருத்துவப் பரிசோதனைகள் உலகின் பல்வேறு நாடுகளிலும் தொடங்கி நடைபெற்று வருகிறது. இந்தியாவில் இந்த தடுப்பு மருந்தின் ஒருங்கிணைந்த இரண்டு மற்றும் மூன்றாம் கட்ட சோதனையை சீரம் என்ற மருந்து தயாரிக்கும் நிறுவனம் மேற்கொள்ளவுள்ளது.

இது குறித்து வெளியிடப்பட்டுள்ள அறிவிப்பில், "ஆக்ஸ்போர்ட் பல்கலைக்கழகத்தின் கோவிஷீல்ட் தடுப்பு மருந்தின் மூன்றாம் கட்ட மருத்துவ பரிசோதனைகள் புனேவிலுள்ள சசூன் பொது மருத்துவமனையில் தொடங்கப்பட்டுள்ளது.

தற்போது, ​​இதற்காக தன்னார்வலர்களை பதிவு செய்துவருகிறோம். இதில் கலந்துகொள்ள ஆர்வமுள்ளவர்கள் 8550960196, 8104201267 என்ற எண்ணை தொடர்பு கொள்ளுங்கள்" என்று தெரிவிக்கப்பட்டுள்ளது.

முன்னதாக, இம்மாதத் தொடக்கத்தில் பிரிட்டனில் இந்தக் கரோனா தடுப்பு மருந்து செலுத்தப்பட்ட ஒருவருக்கு திடீரென்று நரம்பியல் கோளாறு ஏற்பட்டது. இதைத் தொடர்ந்து, பிரிட்டன், இந்தியா உள்ளிட்ட அனைத்து நாடுகளிலும் மூன்றாம் கட்ட மருத்துவப் பரிசோதனைகள் தற்காலிகமாக நிறுத்தப்பட்டன.

இந்தச் சூழலில் செப்டம்பர் 12ஆம் தேதி இது குறித்து விசாரிக்க அமைக்கப்பட்ட குழு, தடுப்பு மருந்து பாதுகாப்பானது என்றும், மருத்துவப் பரிசோதனைகளை மீண்டும் தொடங்கலாம் என்றும் தெரிவித்திருந்தது. அதைத் தொடர்ந்து பிரிட்டனில் மீண்டும் மருத்துவப் பரிசோதனை தொடங்கப்பட்டது.

அதைத்தொடர்ந்து இந்தியாவில் செப்டம்பர் 16ஆம் தேதி தடுப்பு மருந்து சோதனையை மீண்டும் தொடங்க டிசிஜிஐ சீரம் நிறுவனத்திற்கு அனுமதியளித்திருந்தது குறிப்பிடத்தக்கது.

இதையும் படிங்க: கரோனா பரிசோதனை - டாடாவின் புதிய சோதனை முறைக்கு ஒப்புதல்!