உச்சநீதிமன்ற வழக்கறிஞர் படுகொலை..! விசாரணை நடத்த பார்கவுன்சில் உத்தரவு

நொய்டா: உச்சநீதிமன்ற பெண் வழக்கறிஞர் குல்ஜித் கவுர் நொய்டாவிலுள்ள அவரது வீட்டில் படுகொலை செய்யப்பட்டார்.

உச்சநீதிமன்ற வழக்கறிஞர் குல்ஜித் கவுர் உத்தரபிரதேசம் மாநிலம் நொய்டாவிலுள்ள செக்டார் 31 பகுதியில் வசித்து வந்துள்ளார். 60 வயதான இவர் ஓய்வுபெற்ற ராணுவ வீரர் நவ்ஜோத் சிங்கன் மனைவி.

சொத்துத் தொடர்பான பிரச்னையின் காரணமாக வீட்டில் தனியாக வசித்து வரும் இவர், வீட்டு வேலை செய்வதற்கு ஒரு தம்பதியை கடந்த வாரம் வேலைக்கு சேர்த்துள்ளார். இந்நிலையில் செவ்வாய்க்கிழமை இரவு வாயில் துணி கட்டப்பட்ட நிலையில் அவர் சடலமாக மீட்கப்பட்டார்.

இதுதொடர்பாக செய்தியாளர்களிடம் பேசிய காவல்துறை அதிகாரி, வழக்கறிஞர் கொலை செய்யப்பட்ட நாளிலிருந்து அவர் வீட்டிலிருந்த வேலையாட்களைக் காணவில்லை. அவரது ஹோண்டா சிட்டி காரும் மாயமாகியுள்ளது என்றார்.

இதனால் நொய்டாவின் சட்டம் ஒழுங்கு தொடர்பாகவும், இக்கொலையின் விசாரணையை உரிய முறையில் நடத்தக்கோரியும் உச்சநீதிமன்ற பார் கவுன்சில், உத்திர பிரதேச முதலமைச்சர் யோகி ஆதித்யநாத்துக்கு கடிதம் எழுதியுள்ளது.