அரசு அதிகாரிகள் மீது உரிமை மீறல் புகார் - புதுச்சேரி அரசியலில் பரபரப்பு!

புதுச்சேரி : புதுச்சேரி தலைமைச் செயலர் உள்ளிட்ட நான்கு அரசு உயர் அதிகாரிகள் மீது காங்கிரஸ் சட்டமன்ற உறுப்பினர் ஜெயமூர்த்தி உரிமை மீறல் கொண்டு வந்துள்ள விவகாரம் அரசியலில் பெரும் பரபரப்பை ஏற்படுத்தியுள்ளது.

புதுச்சேரி சட்டமன்றத்தில் தீர்மானம் நிறைவேற்றப்பட்டு, அமைச்சரவையில் முடிவு செய்யப்பட்டு மாநிலத்தின் புதிய தேர்தல் ஆணையராக ஓய்வு பெற்ற ஐஏஎஸ் அதிகாரியான பாலகிருஷ்ணன் நியமிக்கப்பட்டார்.

இந்நிலையில் துணைநிலை ஆளுநர் கிரண்பேடி தூண்டுதலின் பேரில் தலைமைச் செயலர் அஸ்வின்குமார், உள்ளாட்சித் துறை செயலர் ,துறை இயக்குனர் மலர் கண்ணன் ,சார்பு செயலர் ஆகிய 4 பேர் புதிய தேர்தல் ஆணையரை நியமிக்க செய்தித்தாள்களில் விளம்பரம் செய்துள்ளனர்.

இது மாநில சட்டமன்றத்தில் அமைச்சரவையும் அவமதிக்கும் செயல் எனக் கூறி புதுச்சேரி அரியாங்குப்பம் தொகுதியின் காங்கிரஸ் சட்டமன்ற உறுப்பினரும், புதுவை மாநில திட்டக் குழு தலைவருமான ஜெயமூர்த்தி சட்டமன்ற வளாகத்தில் உள்ள சபாநாயகர் அலுவலகம் சென்று உரிமை மீறல் புகார் மனு அளித்தார்.

மேலும், சம்பந்தப்பட்ட நான்கு உயர் அதிகாரிகள் மீது உரிய நடவடிக்கை எடுக்க வேண்டும் என்று வலியுறுத்தியவர், சபாநாயகர் சிவக்கொழுந்துவிடம் புகார் மனுவை வழங்கினார்.

அந்த புகார் மனுவை பெற்றுக் கொண்ட சபாநாயகர், இதன் மீது சட்டத்தின் அடிப்படையில் உரிய நடவடிக்கை எடுப்பதாக உறுதி கூறினார்.

ஆளும் கட்சி சட்டமன்ற உறுப்பினர் ஒருவர் தலைமை செயலர் உள்ளிட்ட அரசின் உயர் அதிகாரிகள் மீது உரிமை மீறல் புகார் அளித்த சம்பவம் புதுச்சேரி சட்டப்பேரவை வளாகத்தில் பெரும் பரபரப்பை ஏற்படுத்தியுள்ளது.

இதையும் படிங்க: இரண்டு குழந்தைகளுடன் தாயார் குளத்தில் குதித்து தற்கொலை!