புதுச்சேரியில் ஒவ்வொரு தொகுதியாக மக்களை நேரில் சென்று சந்தித்து அவர்களின் குறைகளை தீர்க்கும் 'மக்கள் குறள்' என்ற குறைதீர்ப்பு முகாம் இன்று தொடங்கபட்டது. முதல் நாளான இன்று நெட்டப்பாக்கம் தொகுதியில் குறைதீர்ப்பு முகாம் நடைப்பெற்றது. அதில் முதலமைச்சர் நாராயணசாமி, தொகுதி சட்டமன்ற உறுப்பினர் விஜயவேணி ஆகியோர் பொதுமக்களின் குறைகளை கேட்டறிந்து மனுக்களை பெற்றனர்.
முகாமில் பல்வேறு துறைகளின் சார்பில் 23 அரங்குகள் அமைக்கப்பட்டிருந்தன. அதில் குடிநீர் வசதி, சாலை வசதி, பட்டா பெயர், குடும்ப உணவு பங்கீட்டு அட்டை வழங்குதல், முதியோர் உதவித்தொகை உள்ளிட்ட கோரிக்கைகளை மக்கள் முன் வைத்தனர். மேலும், அரசு பள்ளி மாணவர்களுக்கு மதிய உணவு வழங்குவது போல் ஐடிஐ தொழில்நுட்ப பள்ளி மாணவர்களுக்கும் வழங்க வேண்டும் என்று மனு அளிக்கப்பட்டது. மனுவை பெற்ற முதலமைச்சர் நாராயணசாமி, மேடையிலேயே 2500 ஐடிஐ மாணவர்களுக்கும் மதிய உணவு அளிக்க அலுவலர்களுக்கு உத்தரவிட்டார்.