ஹைதராபாத் மருத்துவர் கொலை வழக்கு: தெலங்கானாவில் தொடரும் பதற்றம்!

ஹைதராபாத்: பெண் மருத்துவர் பாலியல் வன்புணர்வு செய்யப்பட்டு எரித்து கொல்லப்பட்ட வழக்கில் குற்றஞ்சாட்டப்பட்டவர்களுக்கு எதிராக பொதுமக்கள் போராட்டத்தில் ஈடுபட்டுவருவதால் தெலங்கானா முழுவதும் பதற்றமான சூழல் நிலவிவருகிறது.

ஹைதாராபாத்தைச் சேர்ந்த பெண் கால்நடை மருத்துவர் பாலியல் வன்புணர்வு செய்யப்பட்டு, கொடூரமாக எரித்து கொலை செய்யப்பட்டார். இது தொடர்பாக, லாரி ஓட்டுநர், கிளீனர் உள்ளிட்ட நால்வரை காவல் துறையினர் கைது செய்தனர். அவர்களை விசாரித்ததில், திட்டமிட்டு பாலியல் வன்புணர்வு செய்யப்பட்டு எரித்து கொலை செய்யப்பட்டது தெரியவந்தது.

இதனைத் தொடர்ந்து, மகபூப்நகர் விரைவு நீதிமன்றத்தில் அவர்களை ஆஜர்படுத்த திட்டமிடப்பட்டது. ஆனால், அங்கு நீதிபதி இல்லாத காரணத்தாலும் காவல் நிலையத்தைச் சுற்றி பதற்றமான சூழ்நிலை நிலவுவதாலும் ஷாத்நகர் காவல் நிலையத்தில் நால்வர் விசாரணைக்கு உள்ளாக்கப்பட்டனர். பின்னர், 14 நாட்கள் நீதிமன்ற காவலில் எடுத்து நால்வரை விசாரிக்க குற்றவியல் நீதித்துறை நடுவருக்கு இணையான வட்டாட்சியர் உத்தரவிட்டார். முன்னதாக, குற்றஞ்சாட்டப்பட்ட நால்வரை ஷாத்நகர் காவல் நிலையத்திற்கு அழைத்துச் செல்லும்போது காவல் துறையினர் மீது பொதுமக்கள் செருப்பு வீசினர்.

குற்றஞ்சாட்டப்பட்ட நால்வர் இருக்கும் காவல் நிலையம் வெளியே பொது மக்கள் கூடி போராட்டத்தில் ஈடுபட்டனர். இவர்களை கலைக்க காவல் துறையினர் தடியடி நடத்தினர். இதனிடையே, அம்மாநில ஆளுநர் தமிழிசை சவுந்தரராஜன் கொல்லப்பட்ட மருத்தவரின் வீட்டிற்குச் சென்று ஆறுதல் கூறினார். குற்றஞ்சாட்டப்பட்டவர்களுக்கு ஆதரவாக வழக்கறிஞர்கள் நீதிமன்றத்தில் ஆஜராகக் கூடாது என மகபூப்நகர் வழக்கறிஞர்கள் சங்கம் அறிக்கை வெளியிட்டுள்ளது.