'இஸ்லாமியர்களிடம் வாங்க வேண்டாம்' - பாஜக எம்எல்ஏவின் சர்ச்சைப் பேச்சுக்கு ஜே.பி. நட்டா கண்டனம்!

டெல்லி: இஸ்லாமியர்களின் கடைகளில் பொருள்களை வாங்க வேண்டாம் என்று பாஜக சட்டப்பேரவை உறுப்பினர் கூறிய கருத்து சர்ச்சையானதையடுத்து அக்கட்சியின் தலைமை விளக்கம் கேட்டு நோட்டீஸ் அனுப்பியுள்ளது.

உத்தரப் பிரதேச மாநிலம் டோரியா சட்டப்பேரவை தொகுதியின் 74 வயது உறுப்பினர் மனோஜ் திவாரி. இவர் சமீபத்தில் தனது தொகுதியில் சிலருடன் உரையாடிக்கொண்டிருந்தார்.

அப்போது அவர், “எல்லாரும் ஒரு விஷயத்தை நினைவில் கொள்ளுங்கள். நான் வெளிப்படையாகச் சொல்கிறேன். யாரும் இஸ்லாமியர்களிடமிருந்து காய்கறிகளை வாங்க வேண்டாம்” என்று கூறியுள்ளார். இவரது இந்தப் பேச்சு சர்ச்சையைக் கிளப்பியுள்ளது.

இந்தக் காணொலி இணையத்தில் வைரலானது. இது குறித்து செய்தியாளர்கள் கேட்டதற்கு, “நான் எனது தொகுதியில் 10-12 பேரிடம் உரையாடிக்கொண்டிருந்தேன். அப்போது அவர்களில் சிலர் இஸ்லாமிய வியாபாரிகள் தீநுண்மியைப் பரப்பும் நோக்கில் காய்கறிகளில் எச்சில் துப்பி விற்பனைசெய்கின்றனர்.

அதற்குத்தான் நான் இஸ்லாமியர்களின் கடைகளில் காய்கறிகள் வாங்க வேண்டாம் என்றேன். இதற்கு ஒரு சட்டப்பேரவை உறுப்பினராக என்ன கூற முடியும். நான் கூறியதில் என்ன தவறு இருக்கிறது, ஏன் இதைப் பெரிய விஷயமாக்குகிறீர்கள்?” என்று தனது தரப்பு கருத்தை நியாயப்படுத்தும்விதமாகப் பேசினார்.

ஹார்டாய் பகுதியைச் சேர்ந்த சட்டப்பேரவை உறுப்பினர் ஷியாம் பிரகாஷ் என்பவரும் இதேபோல ஒரு கருத்தைக் கூறியிருந்தார். அவரது கருத்தும் கடும் சர்ச்சைக்கு உள்ளானது.

இதற்கு எதிர்க்கட்சியினர் கடும் கண்டனத்தைத் தெரிவித்துள்ளனர். இந்நிலையில் பாஜக சட்டப்பேரவை உறுப்பினர்களின் இந்தக் கருத்திற்கு அக்கட்சியின் தலைவர் ஜே.பி. நட்டா கடும் கண்டனத்தைத் தெரிவித்துள்ளார். அவர்கள் மீது கட்சியின் நடத்தை விதிகளை மீறியதற்காக நடவடிக்கை எடுக்கப்படும் என்றும் கூறியுள்ளார்.

இந்தச் சம்பவம் தொடர்பாக அவர்களிடம் விளக்கம் கேட்டு உத்தரப் பிரதேச பாஜக பொதுச்செயலாளர் வித்யா சாகர் சோங்கர் நோட்டீஸ் அனுப்பியுள்ளார்.

இதையும் படிங்க: அரவிந்த் கெஜ்ரிவால் வழங்கிய ரேஷன் கூப்பனை வாங்க மறுத்த கம்பீர்