ஊடரங்கு: ஆடுகளுக்கு காலிஃபிளவர் விருந்தளித்த விவசாயி!

மைசூர்: ஊரடங்கு உத்தரவினால் அறுவடைக்கு தயாராக இருந்த காலி:பிளவரை விவசாயி ஒருவர் சந்தைக்கு கொண்டுச் செல்ல முடியாமல் ஆடுகளுக்கு விருந்தாக்கினார்.

மைசூர் மாவட்டம் ஹுன்சூர் அருகேயுள்ள ஹம்மிகே கிராமத்தைச் சேர்ந்தவர் தம்மன் கவுடா. இவருக்குச் சொந்தமான இரண்டு ஏக்கர் விவசாய நிலத்தில் கடந்த மூன்று மாதங்களுக்கு முன்பு காலிஃபிளவர் பயிரிட்டிருந்தார்.

தற்போது, காலிஃபிளவர் விளைந்து அறுவடைக்குத் தயாராகியுள்ளது. இந்நிலையில், கரோனா வைரஸ் பரவுதலைத் தடுக்க முன்னெச்சரிக்கை நடவடிக்கையாக நாடு முழுவதும் 21 நாள்கள் ஊரடங்கு உத்தரவு பிறப்பிக்கப்பட்டுள்ளது. இதனால், காலிஃபிளவரை சந்தைக்கு கொண்டுச் சென்று விற்பனை செய்ய முடியாத நிலை ஏற்பட்டது.

இதன் காரணமாக, அவர் ஆடுகளை வயலில் மேய விட்டு அவைகளுக்கு காலிஃபிளவரை விருந்தாக்கி உள்ளார். இது குறித்து தம்மன் கவுடா கூறுகையில், "காலிஃபிளவரை சந்தைக்கு கொண்டுச் செல்லும் போது காவல்துறையினர் தாக்குவார்களோ என்ற அச்சம் உள்ளது.

மேலும், கரோனா வைரஸ் தொற்றிவிடுமோ என்ற பயமும் உள்ளது. அதனால் தான் எனது வயலில் பயிரிட்டிருந்த காலிஃபிளவரை ஆடுகளாவது சாப்பிட்டு போகட்டும் என்று நினைத்தேன்" எனக் கூறினார்.

இதையும் படிங்க:நீரில் 'வயகரா'! - அத்துமீறும் ஆடுகளால் அதிர்ச்சியில் உறைந்த உரிமையாளர்!