டெல்லி கரவால் நகரில் உள்ள எஸ்.பி.எஸ். காலனியில் அடையாளம் தெரியாத சடலம் ஒன்று இருப்பதாகக் காவல் துறையினருக்கு ஜனவரி 4ஆம் தேதி தகவல் தெரிவிக்கப்பட்டது. இதையடுத்து, சம்பவ இடத்திற்குச் சென்ற காவல் துறையினர் அந்த உடலைக் கைப்பற்றி விசாரணை செய்தனர்.
விசாரணையில் அம்பலம்
விசாரணையில், இறந்தவர் தீபக் எனத் தெரியவந்தது. இதனைத் தொடர்ந்து, காவல் துறையினர் தீபக்கின் குடும்பத்தாரிடம் விசாரணை மேற்கொண்டனர். ஆனால், விசாரணைக்கு குடும்பத்தார் ஒத்துழைப்புத் தரவில்லை எனக் கூறப்படுகிறது. பின்னர், காவல் துறையினரின் சந்தேகப் பார்வை குடும்பத்தார் மீது படர்ந்தது.
தீபக்கின் தந்தை சந்தர் பால் (56), இளைய சகோதரர் நிதின் ஆகியோரை காவலில் எடுத்து காவல் துறையினர் விசாரணை மேற்கொண்டனர். தீபக்கை கொன்றது நிதின் எனவும், இதற்கு தந்தை உதவியதும் தெரியவந்தது.