ஜேஎன்யூ தாக்குதல்: ஸ்டாலின், ராகுல் உள்ளிட்ட தலைவர்கள் கண்டனம்

ஜவஹர்லால் நேரு பல்கலைக்கழக மாணவர்கள் மீது அடையாளம் தெரியாத நபர்கள் நடத்திய கொடூரத் தாக்குதலுக்கு திமுக தலைவர் ஸ்டாலின், ராகுல் காந்தி உள்ளிட்ட பலர் கண்டனம் தெரிவித்துள்ளனர்.

ஜவஹர்லால் நேரு பல்கலைக்கழகத்தில் வன்முறைக்கு எதிராக இன்று பேரணி நடத்தப்பட்டது. அப்போது ஜேஎன்யூ மாணவர் சங்கத்தின் தலைவர் அய்ஷே கோஷ் உள்ளிட்ட பல மாணவர்கள் மீது அடையாளம் தெரியாத நபர்கள் கொடூரத் தாக்குதல் நடத்தினர். இந்தத் தாக்குதலில் காயமடைந்த 18 பேர் எய்ம்ஸ் மருத்துவமனையில் சிகிச்சைக்காக அனுமதிக்கப்பட்டுள்ளனர்.

இந்நிலையில், இந்தத் தாக்குலுக்கு பல தலைவர்கள் தங்கள் கண்டனங்களைப் பதிவு செய்துவருகின்றனர். திமுக தலைவர் ஸ்டாலின், "முகமூடி அணிந்திருந்த நபர்கள் ஜேஎன்யூ மாணவர்கள் மீது நடத்திய தாக்குதலைக் கண்டு அதிர்ச்சியடைந்தேன். குடியுரிமை திருத்தச் சட்டம் நிறைவேற்றப்பட்டதிலிருந்து மாணவர்கள் மீது அதிகரிக்கும் வன்முறை சம்பவங்களுக்கு திமுக சார்பில் கண்டனங்களை தெரிவித்துக்கொள்கிறேன். இந்தச் சம்பவத்துக்கு காரணமானவர்கள் மீது நடவடிக்கை எடுக்க வேண்டும்" என்று தனது ட்விட்டர் பக்கதில் பதிவிட்டுள்ளார்.

வயநாடு நாடாளுமன்ற உறுப்பினர் ராகுல் காந்தி, "ஜேஎன்யூ மாணவர்கள் மீதும், ஆசிரியர்கள் மீதும் நடத்தப்பட்ட கொடூரத் தாக்குதல்கள் அதிர்ச்சியளிக்கிறது. நமது நாட்டை ஆளும் பாசிச சிந்தனையாளர்கள் மாணவர்களின் குரலைக் கண்டு அஞ்சுகின்றனர். அதன் வெளிப்பாடே இந்தத் தாக்குதல்" என்று ட்வீட் செய்துள்ளார்.

இதேபோல டெல்லி முதலமைச்சர் அரவிந்த் கெஜிர்வாலும், ஜேஎன்யூ மாணவர்கள் மீதான தாக்குதலுக்கு கண்டனம் தெரிவித்துள்ளார். மேலும், இத்தாக்குதல் குறித்து விரைந்து டெல்லி காவல்துறை நடவடிக்கை எடுக்க டெல்லி துணைநிலை ஆளுநரிடம் பேசியுள்ளேன் என்றும் அவர் ட்வீட் செய்துள்ளார்.

முன்னாள் அமைச்சர் ப. சிதம்பரம், "அரசின் ஆதரவின்றி இதுபோன்ற தாக்குதல்கள் நடைபெறாது. இதை என்னால் நம்ப முடியவில்லை. முகமூடி அணிந்துள்ள நபர்கள் ஜேன்யூ மாணவர்களை தாக்குகின்றனர். காவல்துறை என்ன செய்கிறது? காவல்துறை கமிஷ்னர் எங்கே?" என்று பதிவிட்டுள்ளார்.

இந்தத் தாக்குதல் குறித்து நிதித்துறை அமைச்சர் நிர்மலா சீதாராமனும் தனது ட்விட்டர் பக்கத்தில் கண்டனங்களைத் தெரிவித்துள்ளார். மேலும், உள்துறை அமைச்சர் அமித் ஷா, இந்தத் தாக்குதலுக்கு பின் டெல்லி காவல்துறை ஆணையரிடம் தேவையான நடவடிக்கையை எடுக்க அறிவுறித்தியுள்ளதாக உள்துறை அமைச்சகம் சார்பில் தகவல் தெரிவிக்கப்பட்டுள்ளது.

இதையும் படிங்க: ஜேஎன்யூ மாணவர்கள் மீது மிருகத்தனமான தாக்குதல்!